Shillong, Nailar 18: Bun na ki riew paidbah khamtam na kito ki nongkyrshan jong ki ar ngut ki MLA kiba la shah beh seng jong u Bah Gabriel Wahlang bad Bah Charles Marngar, ka jingkylli mynta ka long la ka Congress kan leh kumno ïa ka jingïatreilang bad ka NPP ha KHADC bad kane ka jingbym ïoh ïa ka jingshai kaba biang ka la pynsah umdum ïa kiba bun ki nongshong shnong halor ka saiñ pyrthei kaba la mih hapdeng ka NPP bad ka seng Congress.
Ka Congress ka don saw ngut ki MLA, Bah Ronnie V Lyngdoh ba dei MLA bad MDC, Bah Gabriel Wahlang MLA bad MDC, Bah Charles Marngar MLA bad MDC bad u Dr. Celestine Lyngdoh MLA, katba uwei pat u Bah PN Syiem uba dei tang u MDC.
Khlem da kwah ban pynpaw ïa ka kyrteng, ka jingkylli kaba ki kylli, ka long ban ïatreilang ka Congress bad NPP ha KHADC ka long ha kaba u Bah PN Syiem u long u Deputy Chief Executive Member, hynrei ban ïatreilang ha ka sorkar jylla pat kine ki arseng kim long satia.
Kane ka jingbeh seng ka party Congress ïa ki arngut ki MLA ka kren shai ba ka dei ka party kaba bit ïa kiwei bad kam bit ïa kiwei, ki pynpaw ba kum ki nongmihkhmat paidbah ki hap ban trei na ka bynta ban wahrah ïa ki kam pynroi hapoh constituency.
Haba phai sha ka Mawhati ban ïoh ïa ka C&RD Block kan long ka jingmyntoi kaba khraw ïa ki paidbah namar mynta ki hap ban leit sha Umsning na ka bynta ka jingdonkam ka jong ki, ka Block ka long kaba donkam bha ïa ki paidbah nongkyndong ha ka roi ka san bad kiwei ki kam kiba kyrkieh.
