Dang pynkhreh ka sorkar ban pynkynriah noh ïa ki nongdie madan na Laitumkhrah

Shillong, Jymmang 09 : U Symbud Myntri Rangbah ba dei peit ïa ka tnad sor, Bah Sniawbhalang Dhar, ha ka sngi Palei ba ka sorkar ka dang pynkhreh shaid shaid mynta ban pynkynriah noh ïa ki nongdie madan na Laitumkhrah da ka jingtrei ryngkat ryngkat bad ki nongsynshar shnong.
“Mynta ngi la don ha ka kam bad dang ha ka taiew ba la dep ngi la dep ban kynduh bad ki nongialam shnong ka Laitumkhrah ha kaba ki la pynpaw ïa ka jingsngew kmen haba ïadei bad katei ka jingkynduh,” u la ong.
Katkum ka jingïathuh jong u, ka jingpynslem ka dei namar ka jingdon ka jingeh kaba iadei bad ki Dorbar Shnong. U ong ruh ba mynta pat ki la wan da kawei ka rai kaba baroh ki la mynjur lang. “Ki don katto katne ki jaka kiba la dep ban jied bad kumta ngin sa lah ban pynkynriah noh ïa ki ha ka por kaba biang,” u la ong.
Haba kren pat halor ka jingbuh ïa ka lynti ïaid kjat ha Khyndailad, u Myntri Rangbah u la ong ba mynta ka dang ïaid ka jingpynkhreh ïa ka Detailed Project Report.
“Ka jingpynkhreh ïa ka DPR ka dang ïaid, hadien ba la dep ka DPR, ka shim por khyndiat namar ba ngi ap lut, ynda la pynkynriah noh ïa ka ophis u Lamphang ka Iing Dorbar Thawain ka jylla sha New Shillong, ngin sa ïoh ïa ka DPR kaba pura khnang ba ngin sa sdang noh ïa ka kam”, u la ong.