Nongpoh, Ïaiong 04: Kum shi bynta ban dang pynkhlaiñ ïa ki kam shakri na ka bynta ka bha ka miat bad ka jingdonkam ki paidbah hapoh ka imlang ka sahlang kumba la buh thong da ka seng ïa ki mat shakri paidbah, ka HYC Ri Bhoi District ha ka 30 tarik u Lber 2023 ka la lah ban pynïar ïa ka shnat treikam ba la tip kum ka HYC Umïam Circle.
Ka seng HYC ka la ha katei ka sngi ha ka jingïalam u Samla Hercules Suting kum u President bad u Samla Tony Shylla kum u General Secretary ki la pynbam smai ruh ïa ki nongïalam ba pura kane ka HYC Umïam Circle shuwa ba kin shim ïa ka lyngkor nongïalam ban shakri na ka bynta ki paidbah haoh katei ka thaiñ.
Ki nongïalam ba la pynskhem bad pynbam smai ha kane ka sngi ki kynthup ïa u President ba la jied ïa u Bah Sainkupar Kharjana kum u Adviser, Shinestar Kharpran kum u Presdient, Pynshngaiñ, Thangkhiew kum u Vice President, Dondor Thabah kum u General Secretary bad kynthup ki 21 ngut pat ki dkhot jong kane ka circle.
Haba ai jingkren ruh ha kane ka sngi, u President ka HYC Ri Bhoi District, u Samla Hercules Suting u la ai khublei kyrpang ïa kine ki khun samla kiba la kloi ban shimti ïa katei ka kyrdan nongïalam bad ka thong ba ki la shimti kum kita ki nongïalam hapoh ka lama ka HYC ka long ban ai kata ka jingshakri na ka bynta ka eh ka shon jong ki paidbah.
U la kyntu ruh ïa ki ba ka jingrung jongki sha ka seng kam shym mut ba kin ioh jingmyntoi shimet, hynrei kum ki shipai ka seng ki hap ban pyrkhat na ka bynta ka ri bad ka jaid bynriew. Shuh shuh, u la kyntu ruh ïa ki ba kum ki nongïalam ki dei ban trei hok ban ai kata ka jingshakri kaba bha tam ïa ki paidbah, namar lada ki samla ki don kata ka mynsiem ban shakri ki lah ban trei ïa shibun ki kam ba ki paidbah kin dup ioh jingmyntoi lyngba ka lama jong ka seng HYC, u la bynrap.