Dang hap shaniah ki paidbah khappud ha ka Assam wat hadien ba dap 50 snem ka jylla

Shillong, Ïaiong 03 : Ki paidbah ha rilum Garo kiba sah ha shilynter ka khappud ki la mad shibun ka jingeh namar ki dang hap ban pyndonkam da u pincode jong ka Assam na ka bynta ki kam ki jam jong ki, kata ruh wat hadien 50 snem ba ka jylla ka la ïoh ïa la jong ka jylla ba pura.
Ïa kane k amat la wanrah da u MLA ka NPP na Kharkutta, u Rupert Momin ha ka Dorbar Mangtyngka kaba dang shu lah shen.
Katkum ka jingïathuh da u Momin haba kren bad ki lad pathai khubor, u la ong ruh ba ki paidbah ba sah ha khappud jong ka Resubelpara, Kharkutta, Mendipathar ha North Garo Hills ki la mad shibun ki jingeh haba ïadei bad u pincode.
“Ym shym la don satia la u jong u pincode hynrei ki paidbah ki hap ban pyndonkam beit da u pincode jong ka Assam na ka bynta ki kam ki jam naduh ba ïoh la ka jong ka jylla. Kane ka la buh ïa ka jingeh kaba khraw,” u la ong.
Katkum ka jingong jon gu, ki paidbah kiba aplai kam online ki la shah ktah jur namar ka jingpyntip kam poi satïa sha ki.
“Kumta, ngi donkam ban don la u jong u permanent Pincode kham kloi,” u la ong.
Haba jubab halor ka jingkylli, u Momin u la ong, “Ngi la ïakren ruh ïa kane ka ishu haka samoi ba la dep hynrei ngam shym la ïoh ïa ka jubab bad dei na kata ka daw nga la rah ïa kane ka ishu ha Iing Dorbar dang shen.” U ong ruh ba na ka liang u Myntri Rangbah u la kular ba ka tnad ba dei peit kan sa shimkhia ïa kane ka bynta.