Shillong, Nailur, 14: U Myntri Rangbah ka Jylla u Conrad K Sangma ha ka sngi Palei u la ong ba ka Sorkar ka dang ap ktien na ki heh nongïalam jong ka seng kieng atiar ba la kheiñ be-aiñ ka Hynñiewtrep National Liberation Council (HNLC) ban shim rai kumno ban pyntyllun shakhmat ïa ka jingïakren ïasuk.
“Ngi dang ap ktien na ki (HNLC). Tang shu ïoh ïa ka jubab, ngin sa rai kumno ban ïaid shakhmat,” ong u Sangma ha ka jingïakren bad ki lad pathai khubor.
“Kumba nga la ong ha kum kine ki jingïakren, ngi donkam ban pynthikna ba kan don ka jingkhih lang na baroh ki liang. Barh ki kynhun ki dei ban don bynta lang ha ka jingïakren. Namarkata, katba ngi dang jam shakhmat ïa ka jingïakren ki don ki katto katne ki bynta, katto katne na ka liang jong ki bad katto katne na ka liang jong ngi bad ngi dang bishar ïa kata,” u la ong.
“Ngi la phah ktien sha ki baroh lyngba ki ksiang jong ngi bad ngi dang ap ïa ka jubab na ka liang ka jong ki,” u la bynrap.
Haba kylli, u Myntri Rangbah u la ong ba ki Case ba la pynngat da ka NIA pyrshah ïa ki nongïalam ka HNLC ki dei kiba rim.
“Ka dei ka kam kaba la ïaid shakhmat, bad kam dei ka bynta jong ka sorkar jylla, ka dei ka kam jong ka Sorkar Pdeng bad ngi ladep phah jingtip ruh sha ki bad na kata ka daw balei nga ong katba ka jingïakren ka la ïaid shakhmat ha ki bynta bapher bapher bad ki kyndon bapher bapher bad ki jingïakren bapher bapher ki lah ban long bad ki kynhun bapher bapher na ka Sorkar Pdeng, na ka Sorkar Jylla bad na ka liang jong ki bad ngin sa bishar kumno ban ïaid shakhmat,” u la ong.
“Hynrei kumba nga la ong, ka dei ka lynti ïaid bad namarba ki kynhun bapher bapher ruh ki hap ban ïadon bynta lang, ngi donkam ban pynshai na baroh ki liang bad kane kan sa nang ïaid shakhmat,” u la ong bad bynrap, “ha,oid ka dei ka kam kaba khia bad ngi la pynsngew ruh sha Delhi.”
Dang shen, ka HNLC ka la pynpaw ïa ka jingpyrshah halor ka jingïoh shithi khot hajir ïa u General Secretary u Bah Saiñkupar Nongtraw ha ka Kashari jong u Judicial Magistrate. Kane ka seng kieng atiar ka la dawa ïa ka Sorkar ba ka dei ban ai ka jingmap ei ïa baroh ki nongïalam ka seng, hynrei lym kumta ka seng ka lah ban weng noh ïa ka jingïakren ïasuk.
Ha ka 4 tarik, Nailur, 2023, u Symbud Myntri Rangbah uba peit ïa ka tnat Kam Pohing u Bah Prestone Tynsong u la ong ba ka Sorkar ka ladep phah ktien sha ki nongïalam ka HNLC ba ki kwah u Chairman u Bah Bobby Marweiñ bad u General Secretary u Bah Saiñkupar Nongtraw ki dei ban don ha ka jingïakren ïasuk ka ban sa long.
Katkum ka jingong jong u, ka bol mynta ka don ha ka kti ka HNLC bad ka Sorkar ka dang ap ïa ka jubab na ki, shwa ban pyntyllun shakhmat ïa ka jingïakren kaba la ïaid shakhmat.
