Khliehriat, K’lyngkot, 09: U Waheh Shnong jong ka shnong Tuber Kmai Shnong Bah Miki Lyngdoh bad u Secretary IVCS Tuberkmai Shnong Bah Denis Lyngdoh ki la mynsaw jur hadien ka jingshah thombor ha uwei u briew uba la tip kyrteng u Bah Training Phawa.
Kane ka la jia ha ka 3 tarik mynta u bnai ha ka por 11.30 baje mynmiet ha shnong Tuberkmaishnong. Halor kane, u para jong u Waheh Shnong Bah Chelang Lyngdoh u la mudui da ka ejahar sha ki Pulit jong Ladrymbai Police Outpost pyrshah ïa u Bah Training Phawa.
Katkum ka ejahar, u Bah Chelang Lyngdoh u la ong ba u Bah Miki Lyngdoh, uba dei u hymmen jong u bad u Bah Denis Lyngdoh, ha ka miet jong ka 3 tarik mynta u bnai katba ki dang leit ban tem ïa ka jingïaklumar hapoh shnong ha ka dong Kamar Khlot, kyndit kynsan la wan uwei u briew uba kyrteng u Bah Training Phawa uba la mih na kawei ka kali Creta rong lieh kaba don ïa u Registration Number ML-10-C-5037 bad rah lang da u sdie ha ka kti ha kaba u la thombor ïa u Bah Miki Lyngdoh bad ïa u Bah Denis Lyngdoh haduh ba ki la mynsaw jur.
U Bah Miki u la shah pom na ka kti katba u Bah Denis Lyngdoh pat u la mynsaw jur na ki bynta jong ka khlieh. U Bah Denis u la kyllon ha madan khlem tip briew ryngkat ka snam ba lyngkien.
Ïa kine ar ngut kiba la mynsaw la pynkit noh marmar sha Civil Hospital, Jowai West Jaiñtia Hills bad hadien kane la pynkynriah noh Super Care hospital Shillong ban ïoh ïa ka jingsumar kaba kham paka.
