Kylleng ki paidbah ki kwah ban jop biang ka Congress ha Meghalaya: Dr. A Chellakumar

Shillong, K’Lyngkot 09 : U heh ka All India Congress Committee (AICC) ba dei peit ïa ka Meghalaya, u Dr. A Chellakumar hynne ka sngi u la kynduh ïa ki nongïalam na kylleng ki Block bad District Committee ban ïakren bad ïatai ïa kiba bun ki phang kiba ïadei ban pynkhlaiñ ïa ka party shwa kane ka elekshon MP kaban sa long shen.
Haba kren bad ki lad pathai khubor hadien ka jingïalang bad u President ka MPCC Bah Vincent H Pala nalor ki MLA ka party bad ki nongkitkam ka Congress na kylleng, u Dr. Chellakumar u ong ruh ba kylleng kat shaba ki leit ki paidbah ki kwah ba ka Congress kan wan biang ha ka bor.
“Mynin ngi dang wan na rilum Garo bad mynta ka sngi ngi kynduh bad ki nongïalam ka Party na ki district bad ki block. Baroh baroh ki sngewkmen sngew shongshit ban wallam biang ïa ka Congress ha ka bor,” u la ong.
Shuh shuh u la ïathuh ba kat haba ki leit mynta ki paidbah ki shongshit Congress bad kumta na ka party ruh ka pynkhreh ban trei borbah ban ïoh pynkhreh bha na ka bynta ka elekshon MP kaban sa long shen kumba la bthah da ka AICC.
Utei u heh Congress u la ong ruh ba ka High Command jong ka Congress ka la don da ka Screening Comittee ban jied ïa ki kyrtong nalor ba ka don ruh ka committee kaban syllok lang bad ki party ba don ha ka INDIA Block kaba ka kam ka la ïaid shakhmat bad ki party ba donlang.
“Shen hi ngin sa pynbna noh ïa ka thup kyrteng jong ki kyrtong MP namar ngi la don lypa ïa ka Screening Committee. Kumta ym slem shuh ngin sa tip ïa ki kyrtong bad hadien kane ngin sa sdang ïa ka jingïalap elekshon,” u la bynrap biang.
Shwa kane, u Dr. Chellakumar u la ong ba ki paidbah ka jylla hi naduh mynshwa ki ieid bad shaniah ïa ka Congress. U ong ruh ba kito kiba don mynshwa ha ka sem Congress hadien ba ki la dep jop na ka Congress, ki kam ei ïa ka jingjop bad shet kylla ïa ka party.
“Kumta haba ki nongïalam jongngi ki kynduh ïa ki paidbah, kiba bun ki pynpaw ba ki kwah ba ka Congress kan wan biang. Peit ha Rajasthan watla ka Congress ka shah rem ha ka elekshon MLA hynrei ha ka elekshon shiteng samoi u Myntri sorkar ba dei na ka BJP u la shah rem ha u kyrtong ka Congress tang hadien shibnai ba dep ka elekshon,” u la ong.
Na ka liang une u heh AICC u la pynpw ka jingkyrmen ba ka khlem artatien ka Congress kan dang jop bad leh bha ha kane ka elekshon MP na Shillong bad Tura.
Lah ban kdew hangne ba haduh mynta hi dei tang na Shillong ba la tip lypa ba u kyrtong un dang dei hi u MP ba mynta Bah Vincent H Pala katba ha rilum Garo ym pat tip satia ïano ka party kan pynieng.