Shillong, K’Lyngkot, 09: Lai ngut ki rangbah ha ka sngi Baar ki la pynïasoh ïalade bad ka Bharatiya Janata Party (BJP) ha ka jingïalang kaba la long ha ophis treikam jong ka BJP ha nongbah Shillong.
Kine ki lai ngut ki rangbah kiba la pynïasoh kum ki dkhot ka BJP ki kynthup ïa u Dr Wansainbor A Lyngwi na Sohra, u Bah Meïalam Kharmalki na Upper Shillong Sawmer bad u Bah Elnathan Ryntathiang na Umlyngka.
Ïa kine ki rangbah la pdiang sngewbha sha ka party da u Bah Alexander L. Hek uba long ruh u Myntri jong ka Sorkar Jylla ryngkat ka jingsakhi lang jong u State General Secretary Bah Evarist Myrsing, u State Vice President Bah Khraw Basaïawmoit bad kiwei kiwei ki nongkitkam jong ka party.
U Dr Wansaiñbor A Lyngwi u dei u nongïalam barim ka KSU mynba u dang pule ha kolej bad u la pynïasoh ïalade bad ka seng Congress bad shimti ruh kum u General Secretary jong ka Meghalaya Pradesh Youth Congress (MPYC).
“Ka daw kaba la pynlong ïa u ban pynïasoh bad ka BJP ka long namarba u ieid ïa la ka jong ka jylla naduh ka por ba u dang don hapoh ka KSU bad mynta u don ka jingsngewskhem lada ka BJP ka bat ïa u lakam synshar ha ka jylla ki kam pynroi kin nang wan sha ka jylla,” ong u kyrwoh ba la phah da u Spokesperson jong ka BJP Meghalaya State Unit, Bah M. Kharkrang.
