Shillong, K’Lyngkot 09 : U heh ka All India Congress Committee ba dei peit ïa ka Meghalaya, u Dr. A Chellakumar ha ka sngi Ba-ar u la ong ba kito kiba kren beiñ ïa ka Congress bad kiba pynïasyriem ïa ka kum ka jhad ba la ngam, kin sa wan ban ïeng laiñ ha ka por ba ka Congress ka wanphai biang ha ka bor.
“Baroh kito kiba ong ba ka Congress ka dei ka jhad ba la ngam ynda ka party ka la wan bïang ha ka bor, kin sa ïeng ha u laiñ. Bad nga nud ban ai da ka jingthoh mynta,” kob u Dr. Chellakumar haba kren bad ki lad pathai khubor hadien ka jingïalang bad ki nongtrei party ha Congress Bhavan, Shillong.
Da kaba kob ba ka Congress kan wan biang ha ka bor hadien ka elekshon MP 2024, utei u heh ka AICC u la ong, “Ki paidbah kim pdiang ïa ka BJP kumta kumno phin ong ba ka Congress ka dei ka jhad ba la ngam? Ka Congress ka dang don bad kan dang wan biang ha ka bor.”
Shuh shuh u ong ruh ba ki sngewtikna ba hadien ka elekshon MP, ka Congress bad INDIA Bloc kin sa thaw ïa ka sorkar ha ka sorkar pdeng.
Nalorkata u la kob ruh ba ki briew ki lah ban leit ban wan hynrei ka Congress kan ïai don bad kan ïai neh bad ki paidbah. “Ki la don bun ki elekshon ba ka Congress ka shah rem ha kiba bun ki jylla hynrei ha ka elekshon ban wan hadien 10 snem, ka Congress kan sa khie im biang da kaba jop hi marwei ban synshar.”
Ha kawei pat ka liang, u heh Congress u la ong ba ka party ka pdiang sngewbha ruh ïa kito kiba kwah ban wanphai biang sha ka paerty tangba don bun kiei kiei kiba um kwah ban pynpaw namar don ki briew kiba la dung nadien ïa ka party.
