Shillong, K’Lyngkot 09 : U MP ka Shillong ba dei ruh u President ka Meghalaya Pradesh Congress Committee (MPCC) Bah Vincent H Pala ha ka sngi Ba-ar u la kynnoh ba dei ka jingbym shimkhia jong ka sorkar pdeng bad sorkar jylla ba ym lah satia ban pyntyllun shakhmat ïa ka mat ïa kren ïasuk bad ka kynhun kieng atiar Hynniewtrep National Liberation Council (HNLC).
Katei ka jingkren jong u kadei hadien khyndiat sngi ba ka HNLC ka la pynbna ba kan weng noh na ka jingïakren ïa suk da kaba ong ba ka sorkar kam lah ban pynurlong ïa ki san tylli ki mat jingdawa jong ki ba kynthup ïa ka jingdawa ban weng noh ïa ki jingshah pynngat kyndon ïa ki nongïalam kumjuh ïa ki dkhot jong ka seng.
Na ka liang utei u nongïalam ka Congress u la kyntu ruh ïa ka HNLC ba kam dei satia ban krad noh na ka mat jong ka jingïakren ïasuk hynrei ba kan dawa biang ïa ka jingïakren ban bteng ïa ka jingdawa jong ki na ka sorkar.
“Ka long kaei kaei ka bym itynnad ban ïohi ba hadien ba ka HNLC ka la kloi ban wan sha ka miej ïa kren ïasuk hynrei kam don satia ka jingshimkhia na ka sorkar pdeng bad ruh na sorkar jylla,” u la ong.
Da kaba kynthoh ïa ka jingbym lah jong ka sorkar ban tehlakam, u Bah Pala u la ong ruh ba lada peit ïa kine ki ishu, ka paw beit ba ka sorkar ka shu heh tang ha ka jingkular ha ki mat ïakhun elekshon hynrei haba dei pat ha ka kam kim da patiaw than eh khamtam ïa ka thaiñ shatei lam-mihngi jong ka Ri.
Shwa kane, u President ka Congress u la kam ba dei ha ka por jong ka Congress ba la lah ban tehlakam ïa ki kam pyntriem da kaba wallam biang ïa ka suk ka saiñ. U da ai nuksa ruh ba kane kam dei tang ha Meghalaya hynrei wat ha kiwei ki jylla kum ha Assam ruh.
Da kaba ïathuh ba ka Liang Pyrshah kam don jingtip ei ei ïa ka phang ka jingïakren hapdeng ka sorkar bad ka HNLC, u Bah Pala u la ong, “Ym shym la khot ïangi lane ym shym la pyntip bad ïathuh kumta ïa ki jingtip kiba kham bniah phin sa ïoh na ki ym na ngi . Hynrei ka long kaei kaei ka bym sngewtynnad ba ha ka jaka ban pynpynduna ne pynkut syndon ïa ki kam pyntriem kam umsnam, pynban kine ki long lehnohei bad nga shim ba kane ka long ka jingjia bym sngewtynnad.”
Haba pynpaw pat ba u kyrshan pura ïa ka jingïakren ïa suk, une u heh Congress u la ong ba lada long kumno kumno ruh u kwah ba kan don ka jingïakren ïa suk. “Ngi dei ka jaidbynriew rit paid kumta ngim kwah ba ngin dang duh shuh ki hynmen ki para na ka daw ki ktang suloi. Ngim kwah ban duhnoh ïa ka jingsuk tang namar ka jingsngewheh…”
U la kyntu ruh ïa ka HNLC ba kam pat dei ban weng noh ïalade na ka miej ïa kren ïa suk da kaba ong ba kano kano ka rai kaba ki shim kadei ka rai kaba ktah ïa ka kamai ka jih bad ruh ïa ka jingim jong ki paidbah bad bun kiwei kiwei kiba ïadei bad ka jylla.
Haba kren pat halor ka jingdawa jong katei ka kynhun kieng atiar ban weng noh ïa ki jingshah pynngat kyndon, u MP u la ong ba ha kane ka bynta ki don ar tylli kiei kiei kiei, kata lada shu pyndemwait ka dei pat da kawei ka rukom hynrei lada ki wan da ka jingïakren ïa suk ka la wan da kawei pat ka rukom katkum ki kyndon katkum ka riti synshar.
