Shillong, Risaw 31 : Ka National People’s Party (NPP) ha ka sngi Nyngkong ka la pynbna ïa u Bah Allan West Kharkongor kum u kyrtong jong ka party ban aireng ha kane ka elekshon MLA na Sohra constituency ha u 2023.
Ha kane ka sngi ba pdiang burom ïa u Bah Allan sha ka party la donlang ruh naduh u Myntri Rangbah ka jylla, Conrad K Sangma ba dei ruh u National President ka jylla, nangta u Symbud Myntri Rangbah bad National Vice President Bah Prestone Tynsong, State President ka NPP, Dr. WR Kharlukhi, Kong P Nongpluh, President Women’s Wing, nangta u President bad General Secretary ka NPP East Khasi Hills Bah Jied Kurbah bad Bah Aibor Tynsong, nangta ki MDC ka party, Bah Bajop Pyngrope bad ruh ka Kong Grace Kharpuri ba dei ruh kyrtong na Shella constituency nalor kiwei kiwei.
U Conrad haba kren hadien ba la dep pynbna ïa u Bah Allan kum u kyrtong, u la ong ba haka jingtreikam kaba u kynduh, u shem ba u Bah Allan u dei u briew uba ieng bad skhem ka nongrim bad don ruh ka thong ba kano kano ka kam ba u leh kadei ban long beit 100 persen.
Ha kajuh ka por u pynpaw ruh ïa ka jingkmen ban tip ba u don ka jingïadei kaba jan bha bad u kpa jong u, u (L) PA Sangma bad ba u la ïakhun teng ruh na ka tiket NCP (mynta NPP) ha u snem 2009. Nalorkata, u ong ruh ba ym tang ka Sohra constituency kaba donbok hynrei kadei ruh ka jingkmen ïa ka party baroh kawei ba ki ïoh ban khring ïa u briew uba don ka jingshemphang na ka bynta ban kyntiew shuh shuh ïa ka jylla ha ka kam jngohkai pyrthei.
Na ka liang u Bah Prestone pat u la ong ba ka Sohra bad ka Shella kadei ka pliang ksiar bad kumta u ong ba ki don ka jingkyrmen ba da ka jingwan jong u Bah Allan khlem artatien kan wanrah ka jingkylla ïa ka thaiñ Sohra baroh kawei.
Haba bynrap lang, ka Kong Grace Kharpuri, MDC bad kyrtong na Shella ka la ong ba kum ka nongmihkhmat na katei ka thaiñ ka la tip bha shaphang utei u rangbah uba la noh synniang bha naka bynta ban kyntiew ïa ka kam jngohkai pyrthei ha ka thain Sohra baroh kawei. Ka la ong ruh ba dei lyngba u Bah Allan ba la lah ban pynpaw nam ïa ka tamasa tynrai jong ka KHADC ba tip kum ka Monolith Festival, nalor ba u ju rah ruh ïa ka ishu jong ka karkhana MCCL, nangta ka ishu dawa distrik na bynta ka Sohra bad kiwei kiwei.
Shwa kane pat, na ka liang u kyrtong u la pynkynmaw ba ha u snem 2009 u la iakhun teng ïa ka elekshon MDC na ka NCP (mynta NPP) na Sohra constituency hynrei ha kito ki por pat bun kim pat pdiang ïa katei ka party. Pynban la katta ruh u ong ba u la ïoh haduh kumba 3800 tam watla u ïoh por tang khyndiat bnai ruh.
U la pynpaw ruh ka jingkyrmen ba ka mat kaba u maitphang bad ïakhun ban pynïoh distrik ïa ka Sohra kan urlong ha shwa ka Kristmas.
