Pynksan ka Sorkar MDA da ka Prime Programme, SHG, FOCUSS bad ki Mission

Shillong, Risaw, 31: Ka Sorkar Meghalaya Democratic Alliance (MDA) ba la ïalam da ka National Peoples Party (NPP) ka la pynksan ba ka la ai jingkyrshan ïa ki nongshong shnong ka jylla kiba kloi ban ieng la ka ki jong ki kjat khnang ban weng ïa ka jingkyrduh kam.
Kane ka jingpynksan jong ka Sorkar MDA ka long hadien ba ka Federation of Khasi Jaiñtia and Garo Peoples (FKJGP) dang ha ka taiew baladep ka la pynlong daka jingïaid paidbahh pyrshah ïa ka jingbym ïohkam ha nongbah Shillong.
“Naduh ba kane ka Sorkar ka la shimti ïa u lakam synshar, ngi don haduh ar hajar ngut ki nongsengkam thymmai kiba la ïoh jingkyrshan na ka Sorkar. Kine kim dei tang ki riewshimet hynrei ki dei ki briew kiba ju pynïaid ïa ka sengkam sengjam,” ong u Myntri Rangbah ka Jylla.
“Ka PRIME programme ka la long kawei na ki prokram bakongsan tam kaba ngi la sdang. Nalor kata, palat 20,000 hajar tam ki Producer Group bapher bapher ngi ladep thaw khnang ban ai jingïarap ïa ki ha ka rep ka riang bad nalor kaba ai jingkyrshan pisa ruh ïa ki,” la ong u Myntri Rangbah.
“Ngi la pynkha ruh bun tylli ki Cooperative Society khnang ban ïoh ai jinghikai pynbtit ha kaba shna jingbam, song jingbam bad ban pynïaid iew shabar ka jylla. Ngi don bun tylli ki Self Help Group (SHG) kiba ngi la pynkha ha kane ka Sorkar ïa kiba ym ju don mynshwa. Kine ki dei ki mawjam na ka bynta ban pyntyllun ïa ka khih ka kamai,” u la ïathuh.
“Ban shu phaikhmat tang ban ïohkam Sorkar ka dei kaba suk. Namarkata, na ka liang jong ngi, ngi la ai jingkyrshan ïa ki nongsengkam lajong ban kyntiew ïa ka ïoh ka kot, da kaba plie bun tylli ki Home Stay hapoh shi bnai shiteng. Palat 700 ngut ki briew kiba la aplai na ka bynta kine ki kam,” la ong u Sangma bad bynrap, “kane kam dei tang ïa ki nongseng kam hynrei wat ïa ki briew ruh ki la ïohkam.”
Haba ai nuksa ba ka jingplie ïa ka Vitanta dang shen ka la aikam palat 100 ngut ki briew, u Myntri Rangbah u la ong, “palat 100 ngut ki briew ki la ïohkam bad bun na ki, ki dei kiba la trei shabar ka jylla bad mynta ki la ïohlad ban trei ha la ka jong ka jylla. Na kine ki 100 ngut, 80 percent ki dei ki kynthei.”
“Ki kam Sorkar ki don hynrei ban pyndap ïa ki kam kiba thylli ki don da ki kyndon,” u la ong bad ïathuh ba wat ha ki kam nonghikai kiba thylli haduh 1000 tylli ba la shu thung da ki nonghikai ba shipor ladep pyndap.
“Ha kajuh ka rukom ka jingthungkam ha ki tnat treikam ka Sorkar ki dang ïai bteng katba ngi dang ïakren. Ïa kine ki jingeh ngi la sdang ban weng. Nga sngewkhia ïa ki jingeh ba la pynpaw da ki paidbah bad ka Sorkar ka la shimkhia ïa kane ka jingeh namarba manla ka jylla bad manla ka ri ki mad ïa ka jingkyrduh kam,” ong shuh shuh u Sangma.
Haba kylli halor ka jingdawa jong ka FKJGP ban thaw da ka State Employment Policy, u Conrad Sangma u la ong, “kam dei kaba suk ban thaw kam lada phi phaikhmat tang sha ka kam Sorkar.
“Ha ka rep ka riang, ngi la wanrah ïa ka polisi bapher bapher la ka long ha ka FOCUS Programme, ka Milk Mission, ka Piggery Mission lane kiwei kiwei ki mishon ngi ba la wanrah la ka long ka IVCS Programe bad ki jingai jinghikai, kine ki dei ki polisi kiba ka ka Sorkar ka la leh ban weng ïa ka jingkyrduh kam ha ka liang ka rep ka riang,” la pynksan u Sangma.
“Na ka bynta ki kynhun bapher bapher jong ki kynthei ngi ladep thaw ïa ki prokram ha kaba 40,000 hajar tylli ki kynhun jong ki kynthei ki don don ïa ki dkhot kiba palat 4 lak tam. Kine ki la ïoh jingkyrshan pisa bad ïoh jingïarap lyngba ka polisi ban kyntiew ïa ka khih ka kamai bad ban tem ïa ka jingkyrduh kam,” u la ong.
Haba kren halor ka Jngohkai Pyrthei, u Myntri Rangbah u la ong, “ngi la wanrah ïa ka polisi kumno ban ai jingïarap ban shna pynbha ïa ki jaka jngohkai pyrthei, la ka long ha kaba shna ïa ki Home Stay, ki Hotel kiba heh, ki kali kamai ki ban long kum ki Travel Agent bad ban aiwai ïa ki kali haba donkam.”