Ym hun u Laitmawsiang ïa ka jubab RTI ba shna ïa ki surok

0

Shillong, Risaw, 31: U Bah Latham Khongsit na ka shnong Laitmawsiang kaba hap hapoh ka Khatarshnong-Laitkroh Community & Rural Development Block u la ong ba um hun satia ïa ka jubab jong u Block Development Officer (BDO) ha kaba ïadei bad ka jubah RTI kaba u la pan halor ki surok ba la pyntrei hapoh ka shnong Laitmawsiang.
Ha ka jingïakren bad ki lad pathai khubor ha ka Lah Sngi U Blei, u Bah Latham u la ong ba ka jingpan RTI jong u ïa ki surok kiba la shna hapoh ka shnong Laitmawsiang kaba hap hapoh jong ka Hima Sohra ka long ban tip haduh katno la pynlut ha kaba thied tair bad shna ïa ki surok dewbilat.
U la ïathuh ba ki surok ba la siang da ka dewbilat hapoh ka shnong Laitmawsiang ki don san tylli bad haba kheiñ lang baroh ki la lot sha ka 1.80 kilomitar bad ka jubab RTI kaba la ai da u BDO ka shu pynpaw ba ka jinglut baroh ka long T.59 lak tyngka, hynrei khlem da batai pat kumno la pynlut ïa kane ka pisa.
U la ong ba u la pan RTI haduh lai sien lynter ha kaba ïadei bad ka surok ha shnong, hynrei ha jubab ka long ba la mang pisa T.33 lak tyngka na ka bynta 1 kilomitar bad na ka bynta 1.80 kilomitar ka jinglut ka long T.59 lak hynrei khlem da batai kumno la pynlut ïa kane ka pisa.
U Bah Khongsit u la ong ba u BDO u khlem jubab ïa kaei kaba u pan hynrei u la shu ai kyllum ïa ka jingkylli.
U la ong ba ka jingpan RTI jong u ka long ban tip haduh katno la thied ïa u shyiap, u mawria, ka dewbilat, hynrei u BDO khlem jubab ïa kata hynrei u la shu ai kyllum ïa ka jubab kaba um hun satia.

Leave A Reply

Your email address will not be published.