Da long janai shwa ban thep Vote, kyntu u DEO WKH

0

Nongstoiñ, Rymphang, 25: U District Election Officer (DEO) jong ka West Khasi Hills bah Garod LSN Dykes, u la pyntip sha baroh ki nongthep vote ba katkum ka jingbthah jong ka Election Commission jong ka Ri India (ECI), ban jied ïa ki nongmihkhmat sha ka ïing dorbar thaw aiñ ka ban long ha ka 27 tarik mynta u bnai Rymphang 2023, u la kyntu ba kin rah ïa la ki Elector Photo Identity Card (EPIC) ha katei ka sngi hala ki polling station na ka bynta ka jingpynshisha shwa ba kin thep ïa la ki vote jong ki.
Ki nongthep vote ki bym lah ban pynshisha lyngba ki EPIC ki lah ban rah kawei na kine kum ka jingpynshisha kata ka Aadhaar Card, MGNREGA Job Card, Passbooks lane Post office, Health Insurance Smart Card, Driving License, PAN Card, Smart Card ka NPR, Indian Passport, Pension document bad ka dur, Service Identity Cards, Official identity cards ba la ai sha ki MP/MLA/MDC bad ka Unique Disability ID (UDID) Card.
Ïa ki Voter Slip yn sa sam la kumno kumno 5 sngi shwa ka jingthep vote sha baroh ki nongthep vote ba la pynrung kyrteng ha ka Electoral Roll da ka ophis u DEO. Kumta u DEO u la kyntu ban ïa mih ryntih paidbah ha katei ka sngi kata ka 27 tarik u Rymphang, 2023 ban jied ïa la ki nongmihkhmat.
Ha kajuh ka por, khnang ban wanrah ïa ka jingpynïaid beit ïaid ryntih ïa ka jingjied ïa ki nongmihkhmat sha ka ïing dorbar thaw aiñ ka ban long ha ka 27 tarik u bnai Rymphang 2023, ban ym thud ka jingïaid jong ki kali kiba kit ïa ki polling parties, ki police personnel, ki officer kiba don duty ki ban leit sha ki polling station bapher bapher jong ka District, u District Magistrate ka West Khasi Hills bah Garod LSN Dykes IAS, u la pynjari da ka kyndon 144 CrPC kaba khang pyrshah ïa ka jingïaid jong ki kali kit dewiong ha baroh kawei ka District naduh ka por 7 janmiet jong ka 24 u Rymphang, 2023 haduh ka 7 mynstep jong ka 28 u bnai Rymphang 2023.
Lada lap ïa kino kino kiba ïaleh pyrshah yn pynshitom katkum ka section 188 jong ka Indian Penal Code, 1860. Kane ka hukum kan treikam noh mardor tad haduh ban da pynbna da kumwei pat.

Leave A Reply

Your email address will not be published.