Nongpoh, Nailur 11: Kum kawei na ka seng sain pyrthei kaba la ïaid lynti mynta la 26 snem naduh ba la suid la shor halor ki jingangnud kiba bun ban shakri ïa ki paidbah hapoh ka jylla la ka long ha ka kam sain pyrthei ne ha ka bha ka mait jong ka jylla, ka United Democratic Party (UDP), Ri Bhoi District mynta ka sngi ka la rakhe ïa kane ka sngi kyrpang da kaba leit ai jingïarap da ki mar bam sha kawei na ka jaka ri khunswet ba la pynïaid da ka Ri Bhoi Presbyterian Synod kaba don ha ka shnong Mawsyntai.
Kane ka jaka ri khunswet ba ka UDP Ri Bhoi ka la leit ban synñiang da ki marbam ka dei ka Children’s Home kaba don ha ka shnong Mawsyntai bad la leit ruh ban sam da ki marbam kum shi bynta ban rakhe ïa kane ka jingdap 26 snem ka party, ha kaba ïa kane ka party la seng da u (L) E. K Mawlong ha u snem 1997 ba kane ka party kala rakhe ha kylleng ki jaka jong ka Ri Lum Khasi Jaintia.
Haba leit ban aiti da ki marbam sha katei ka jaka ri Khunswet shi bynta ban rakhe ïa kane ka sngi kyrpang ba la suid la shor ïa ka UDP Party, ki nongïalam ka UDP ba kynthup naduh u MDC ka Nongpoh, u Bah Balajied Rani, u Vice president ka UDP Ri Bhoi, u Bah Michael Kharhunai, u Secretary ka UDP Ri Bhoi, u Bah Jeffrey Khymdeit bad kynthup kiwei kiwei ki nongïalam ki la leit ban iuh kjat ïa katei ka jaka ri khunswet na ka bynta ban aiti ïa kitei ki marbam sha ki bor pynïaid katei ka jaka ri khunswet.
Haba kren ruh ha kane ka sngi, u Bah Balajied Rani kum u MDC bad u nongïalam ka UDP ha Ri Bhoi, u la pynpaw ïa ka mynsiem jong ka jingkmen ban rakhe ïa kane ka sngi ba ka UDP party ka la ïaid lynti haduh 26 tylli ki snem ban shakri hapoh ka jylla bad kum shi bynta ban rakhe ïa kane ka party ki la shim ruh ïa ka sienjam ban ïarap da ki marbam sha katei ka jaka ri Khunswet ba la pynïaid da ka Ri Bhoi Presbyterian Synod.
U la ong ruh ba ka UDP party naduh ba la seng ïaka ha u snem 1997 ka la ïaid lynti mynta la 26 tylli ki snem bad naduh kitei ki sngi haduh mynta kane ka party ka la lah ban leh shibun ki kam kiba khraw ban kyntiew ïa ki paidbah ka jylla bad ruh ha baroh ki liang ba ka party kala saindur na ka bynta ban shakri pura ïa ka dawbah jong ka jaid bynriew hapoh ka jylla.
Shuh shuh, kum u nongïalam u la pynpaw ruh ba kane ka jingrakhe ïa ka jingdap 26 snem ka party ha kylleng ki jaka jong ka jylla kam dei kaba kut bad ka party kan dang ïaid lynti sa bun tylli ki por bad ki snem bad ka thong ba hakhmat eh jong ka party ka long ban saindur na ka bynta ka bha ka miat bad ka roi ka par jong ki paidbah hapoh ka jylla ba kum ka party ruh ka khot ka wer ïa ki paidbah ba kin ai ïa kata ka jingïatrei lang ban poi sha kata ka thong ba ka party ka angnud ban pynurlong hapoh ka jylla, u la bynrap.
