Nongpoh, Naiwieng 19: Kum ka jingdon bynta bad kiba bun ki longing ba duk ba rangli haka thaiñ Umdihar ba kin ioh ïaki jaiñ kup syaid hadien ka jingwan biang jong ka aiom tlang bad khamtam ka jingpynkhreh ïaka jingwan jong ka khristmas, ki samla Youth Congress Umsning Constituency mynta ka sngi kila leh da ka kam ba bha ban leit aiti da ki jaiñ kup syaid sha kiba bun ki longing ba duk ba rangli haki shnong ba don haka thaiñ Umdihar.
Kitei ki samla ka Youth Congress jong ka Umsning Constituency hapoh ka jingïalam jong u samla Aibor Shadap kum u president, u samla Robert Nongrum vice president, u samla Rishanbor Makri Working President kila leit ban aiti ïakitei ki jaiñ kup syaid sha ki longing jong ka Umdihar Area ba kynthup ïaka shnong Pahamdmu, Rongmasek, Langpadon, Umnget, Umsawnongkharai, Rongpharkong bad ka shnong Pahamrñai.
Katei ka jing leit ai sngewbha jong katei ka kynhun, ka long ba hadien ba ki la peit thuh bha ia kino ki longiing kiba ba dei hok ban ioh namar bun naki longing ba duk ba rangli kim iohlad satia ban thied ïaki jaiñ kup syaid ha kum kane ka por ba ka jingkhriat sa shisien kala wan biang lyngba ka aiom tlang.
U Samla Aibor Shadap u la pynpaw ka jingsngewkmen ba kila ioh ban ïarap ïa ki longiing ba duk da ki blanket naka bynta ba kin ioh ban kup syaid ha kane ka aoim tlang bad kum ba ka iing ka sem ki kwah ban lehkmen ïa kane ka khristmas bad ki longiing ba duk ba rangli.
