Da ki jaiñ Blanket leit ai jingïarap ka HNYM Nongpoh Zone sha ka jaka ri khunswet ha Mawsyntai

0

Nongpoh, Naiwieng 13: Hala ka jong ka jingkot bor kum ka seng kaba ieng ban shakri na ka bynta ka bha ka mait bad ka roi ka par jong ka imlang ka sahlang, ka Hynñiewtrep National Youth Movement (HNYM), Nongpoh Zone ha ka sngi Saitjaiñ ka la leit ban ai jingïarap da ki jaiñ Blanket sha ki khunswet kiba don ha ka jaka ri khunswet ka Ri Bhoi Synod, ha Mawsyntai.
Ki nongïalam ka Seng HNYM, Nongpoh Zone ha ka jingïalam u Vice President, u Bah Batlakupar . Mawlong ryngkat kiwei kiwei nongïalam ki la shim ïa kane ka sienjam ka long shi bynta ban phai khmat lem ïa ki jingdonkam jong ki khunswet kiba sah ha katei ka jaka ri khunswet ha Mawsyntai.
Haba leit ban aiti ïa kitei ki jaiñ Blanket la sakhi lang ruh da ka jingdon lang ki bor pynïaid katei ka jaka ri khunswet ryngkat u Rangbah Shnong ka Mawsyntai, u Bah Kitbok Sylliang bad u Secretary Shnong, u Bah Elevenson Makdoh, ki tymmen basan ka Mawsyntai lem bad ki khynnah ha ryngkat ki nongïalam ka seng HNYM, Nongpoh Zone.
Kumba la pynpaw da ki nongïalam ka HNYM, ka daw kaba la pynlong ïa ki ban leit ai jingrap ka long ban phai khmat lem sha kito ki khynnah kiba sah ha katei ka jaka ri khunswet bad kane ka jingai jongki, ka long ruh katkum ka jingkotbor ka seng ha kaba lada kim lah ban ïarap baroh ki jingdonkam, hynrei shi bynta pat kan ïarap ïa ki na ki jingdonkam ba ki donkam khamtam ba la poi kane ka aiom khriat.
Ha kawei ka bynta, ki la ai ruh ka jingkhublei naduh ka Ri Bhoi Synod bad kito ki nongtrei ha katei ka jaka ri khunswet, ba ki la kloi ba kner bad kdup ïa ki khynnah bad kane ka long shi bynta ka jingshakri ïa u briew ka dei ka jingshakri ïa u Blei ba ka seng ruh ka dang angnud ban leh shibun ki kam kiba bha kiba dei katkum ka jingkotbor jong ka seng, ki la pynpaw.

Leave A Reply

Your email address will not be published.