Da ki hajar tuid ki paidriewngeit sha ka Proseshon Iukharist ha Nangbah, Jowai

0

Jowai, Rymphang 2: Kumba ju long shisien shisnem la pynlong ïa ka Proseshon Iukharist jong ka Assumption Catholic Church, Parish Nangbah la pynlong ha ka sngi U Blei bad da hajar ki paidriewngeit ki la ïatuid sha Nangbah bad ïashim bynta ha ka Proseshon Iukharist da ka mynsiem kaba shongkun shongblei bad kaba iphuh iphieng.
Ha ka por mynstep la pynlong ïa ka jingkñia Mass Iukharist Bakhuid da u Procurator jong ka Jowai Diocese u Lyngdoh Sohblei Cresense Roy Laloo ha ryngkat ka jinsynran lang da ki Lyngdoh Sohblei kiba wan na ki Parish ba marjan. Ha kane ka jingkñia Mass da ki hajar ki paidriewngeit ki la ïashim bynta ha ka ïabam ïasip ïa U Kpu U Rynsi Uba la pynkyntang uba long ka Met bad ka snam jong U Trai Jisu Khrist.
Ha ka nohphai sngi la pynlong ïa ka jingïaid Proseshon Iukharist hapoh ka shnong Nangbah lyngba ka kyntoit Lumshor, Pohmission (Pohskur), Iawmusiang da ki sur jingrwai, da ki sur jingtem jingput jong ka Cathedral Band Shillong ha shilynter lynti kaba khring ïa ki paidbah jong ka shnong Nangbah ban iamih peitkai ïa kane ka jingïaid proseshon kaba iphuh ipjieng bad kaba shongkun shongblei bad wanphai pat sha Madan Assumption Parish Mulang.
Ha shwa ban pynkut ïa kane ka sngi da ka jingkyrkhu da ka Sakrament Bakhuid Tam ka Duwan, la ïoh ïa ka jingkren kaba sngewtynnat da u Lyngdoh Sohblei Manbha Pakem halor ka phang ka jingkhraw jong ka Sakrament Iukharist Bakhuid kaba long ka Met bad ka Snam ba im jong U Trai Jisu Khrist, kaba U Jisu hi U la kren ha ka jingkhawai miet bakhatduh, “To shim bad to bam kane ka long ka Met bad ka Snam jong nga.”

Leave A Reply

Your email address will not be published.