Da ki Cable Car yn pynïasoh ïa ka Ïew Nongkseh bad ka Shillong, ong u Myntri ka Tourism

Shillong, Rymphang 26 : U Myntri ka tnat Tourism bad uba khmih ruh ïa ka Tnat Arts and Culture u bad Paul Lyngdoh u la ong ba ïa ka ïew ki mynbarim kaba don ha ka shnong Nongkseh Upper Shillong yn pynïasoh noh da ki Cable Car.
Haba ïakren bad ki lad pathai khubor u la ong ba hadien ba ka tnat Tourism ka la ïoh jingtip kaba thikna ba ka don ka ïew kaba ki mynbarim ki la ju pynlong ïew ha ki por hyndai hynthai hapoh ka shnong Nongkseh Upper Shillong kaba long trai ruh da ka kur Thangkhiew kumta ha kane ka sngi na ka liang jong u bad u Chairman ka MTDC u Bah Sanbor Shullai ha ryngkat ki ophisar ki Engineer u Rangbah Shnong u Bah A Thangkhiew ka shnong Nongkseh ki la leit ban jurip ïa katei ka ïew kaba la pynlong ïew lyngba ka jingdon jong ki Mawbynna bapher bapher.
Haba ïohi ïa ka jingpynsah nam bad pynneh pynsah ïa ki kam ki mynbarim bad hadien ka jingjurip na ka liang u Myntri u la pynbna syndon ruh ba ïa katei ka jaka ïew ba kan long noh kum ka Heritage site, ne ka ïew kaba dei ban sumar bad pynneh pynsah bad ban sumar bha ïa ka.
Lah ban ong ba ha katei ka jaka ki kur Thangkhiew, ki la don ki Mawbynna babun tylli kiba la don la ki jong ki jong ki basa kaba ki ju pynlong ïew ha ki por Hyndai hynthai bad kaba dang ïaisah haduh mynta mynne.
Halor kane u Bah Paul Lyngdoh u la ong ba hadien ba la ïohi da la ki jong ki khmat la sngewdei ban pynbna ïa kane ka jaka ka Heritage site ha kaba kan don ka jingker, ka jingsumar bad ba kan ym jot noh hynrei kan dei ban long ka jingmyntoi jong ki nongshong shnong.
U la ong ba na ka liang ka tnat Arts and Culture kan wad ki lad ki lynti la kane ka jaka ka long ne em ban pynïasoh ïa ka Nongkseh bad ka Shillong, ka Mawprem bad ka Mawlai da ki Cable Car kaban khring ruh ïa ki nong jngohkai pyrthei.
“Kaba nyngkong ka dei na ka bynta ki nong jngohkai pyrthei bad kaba ar kan pynsuk ïa ki nongleit nongwan ha jaka ba kin shong bus ne taxi kin pyndonkam noh da ki Cable Car bad kan long ruh kum ka jingplie bad aikam aijam ïa ki nongshong shnong,” ong u Bah Paul.
U la ong ba na ka liang ka Tourism bad ka Meghalaya Age Limited kin sa pynkhreh ïa ka report la kane ka jaka kan long ne em ban ïaid shakhmat ban pynïasoh da ki Cable Car namar kane ka projek kadei kaba lah dep don lypa halor ka jingthmu ban shna ïa ki Cable Car na Laban kaba dei ka view point sha Shillong bad tang lah sdang ïa kane kawei ka kam kane ruh kan sa ïaid lang shakhmat ban ïoh ban pyndep kumba la angnud.
Kane ka jaka ka long kaba itynnad bha bad nalor ki Mawbynna, na kane ka jaka lah ruh ban ïohi kyndiang ïa ki shnong bapher bapher ka Nongbah Shillong nalor ka jingdon ka Kshaid kaba itynnad kaba la wan tuid na ka wah Umshyrpi sha ka Kshaid Bidon Bishop Falls.