Shillong, Rymphang, 27: U Myntri Rangbah barim u Dr. Mukul Sangma uba dei ruh u MLA ka TMC na Songsak ha ka sngi Baar u la takraiñ tyngeh ïa ka Sorkar Jylla halor ka jingpynmih hukum ban pynkynriah kam ïa u Deputy Commissioner jong ka North Garo Hills hadien ba u la hukum ban thung ïa ka jingtohkit halor ka jingwanrah be-aiñ ïa u kwai tyrkhong na ka ri Bangladesh bad kumjuh ruh ha kaba ïadei bad ka jingshalan ïa u dewïong.
Haba ïashim bynta ha ka jingïathir ïatai halor ka Mang Tyngka, u Dr. Mukul u la ong ba ïa ka hukum ban pynlong ïa ka jingtohkit da u Deputy Commissioner la pynmih ha ka 4 tarik, Kyllalyngkot, 2024.
“………hynrei kaei kaba la jia ka Sorkar ka ïada ïa kiba dei ban ai jingïada, ha ka sngi kaba bud (ha ka 5 tarik Kyllalyngkot) ka hukum pynkynriahkam ka la mih bluit………ha kaba u DC u la shah pynkynkynriah kam. Mynta, nga kwah ban tip na ka Sorkar hato hadien ka jingpynkynriah kam ïa u DC ka jingtohkit ka dang ïaid neem shakhmat, lane, don mano mao bym shym leh shuh ïa kata, namarba ka hukum jong u DC ka dei ban ieng,” u la ong.
H a kawei pat ka liang, u Dr. Mukul u la dawa ba dei ban thung da ka jingtohkit halor ka jingshah kawut lathi ki dkhot ka HYC ha u Pulit Ophisar hapoh Pynursla Police Station.
“Nga la ïoh ïa kiwei ka jingpyntip na ka HYC, kaba ïadei bad kawei ka jingjia ha ka 24 tarik mynta u bnai ha kaba ki sengbhalang ki la leit pyntip sha ki Pulit ka Pynursla shaphang ka jingshalan tuh ïa ki muid. Hynrei kaei kaba la jia ka la pynkyndit, ha ka jaka ba ki Pulit kin pyndep ïa ka kamram halor ka jingujor ki la leh donbor pynban, nga kwah ban thung jingtohkit halor kane,” u la ong.
