Shillong, Rymphang 27: Ka Tnad Meghalaya Police kala register haduh 42 tylli ki case jong ka cyber crime hapoh ki Cyber Crime Police Station tang ha kine ki san snem bala leit.
“Naduh u snem 2019 haduh ka 31 tarik Kyllalyngkot, 2024, haduh 42 tylli ki case la register hapoh ka Cyber Crime Police Station, kiba ïadei bad ki cyber crime” ong u Myntri Rangbah ka Jylla Conrad K Sangma hapoh ka ïing Dorbar Thaw Aiñ ha ka sngi Ba-ar.
Ula jubab ïa kane ha ka zero hour notice bala wanrah da u MLA ka UDP na Nongpoh Bah Mayralborn Syiem kaba ïadei bad ka jingpynmih khubor thaw hi jong kawei ka YouTube Channel ba pynthoh bria ïa u Chairman ka Synjuk ki Rangbah Shnong ka Ri-Bhoi Bah BB Makdoh, kaba la pynmih ha ka 19 tarik Rymphang.
U Conrad ula ong, khnang ban tehlakam ïa ka jingpynmih ïa ki khubor lamler lane ki cyber crime hapoh ka Jylla, ka tnad Pulit kala thaw ïa ka Cyber Crime Wing kaba treikam hapoh ka Criminal Investigation Department.
Ki unit jongkane ka Wing ki kynthup ïa ka Cyber Crime Police Station, ka Cyber Forensic Training Facility (CFTF) bad ka Cyber Assistance Cell & Monitoring Cell.
Ka bynta jong ka Cyber Crime Police Station ka long ban tohkit ïa ki kam bymman lyngba ki kor internet, khanglad ïa ki kam bymman na ki kor internet bad ai jinghikai ïa ki paidbah ban nym ngop ha kine ki kam bymman.
U Myntri Rangbah ula ong ba nalor kine ki case bala register, ka Cyber Crime Wing kala pynlong ruh ia 20 tylli ki prokram ai jinghikai bad ruh haduh 55 tylli ki prokram pynsngewthuh paidbah ha ki skul, ki college bad ki jaka pule bapher bapher.
