Shillong, Rymphang 27: U Myntri Rangbah ka Jylla Conrad K Sangma mynta ka Lah Sngi U Blei ula pyntip hapoh ka ïing Dorbar Thawaiñ ka jylla ba ka Sorkar ka la ïoh pdiang palat 30,000 tylli ki aplikeshon ban seng kam seng jam lajong kat kum ka skhim CM-Elevate tang hapoh ka arbnai.
“Ngi la ïoh pdiang palat 30,000 tylli ki aplikeshon ïa ka CM-Elevate hapoh ka 2 bnai. Na kine, 20,000 ki dei jong ka kam ri jingri jingdup. Hapoh ka CM-Elevate, ka Sorkar ka la ai 50% ka subsidy” ong u Conrad haba jubab hapoh ka Dorbar Mangtyngka ka Jylla.
Ha kajuh ka por, u Myntri Rangbah ula ong ba ïa mynta hi, ka kam ri jingri jingdup kam pat dei kaba la kheiñ ha ka thup ki karkhana (industry) hynrei ki food processing ki dei ki kam karkhana (Industry).
Haba u MLA ka UDP na Mawkyrwat Bah Renikton L Tongkhar u kwah ban tip ïa ki subsidy ba ai ïa ka kam ri jingri jingdup, u Myntri Rangbah ula ong ba ïa ka prokram ka dei kaba dang shu sdang ha u snem ba la leit noh ha kaba ka Sorkar kala sam ïa ki khun sniang, khun syiar sha ki nongrep bapher bapher.
Ula ong, kawei na ki prokram ba kongsan eh ka dei ka CM-Elevate, ha kaba ka Sorkar ka la ai ïa ka subsidy kaba heh duh khamtam sha ki kam ri jingri jingdup kaba long haduh 50%.
Halor ka jingkylli balei ka Sorkar kam ai lang kajuh ka jingmyntoi bala ai hapoh ka Industrial Policy sha ki nongri jingri, u Myntri Rangbah ula ong “Ka daw hi ka long ba ka kam ri jingri ka dei ka kam ri jingri bad ka kam karkhana ka dei ka karkhana kat kum ki jingbatai ki ain ki kanun bad kumta, ym lah satia ban pynïakhleh”.
Hynrei ula pyntip ba ka Sorkar ka la ai ïa ki jingkyrshan kiba bun ïa ki nongrep hapoh ka Jylla. Ula pyntip ba palat 100 tylli ki pickup truck la ai ban pynkit ïa ki marrep jong ki nongrep. “Ngi kwah ban ai biang sa 500 tylli ki kali ha kine ki san snem ban wan” ula ong.
