Shillong, Kyllalyngkot 6 : U Nongïalam ka Congress uba dei ruh u MP jongka jylla u ma Vincent H Pala u la ong ba dei ban pyndonkam da ki bor teknoloji ban talasi mynder ha ka jylla namar ka long kaba eh haduh katta katta ban leh hi da ki briew.
“ Ngi dei ban pyndonkam da ki kor teknoloji bad kita ki kor ki bor ki dei ban long kiba bha, kiba thikna bad kiba lah ban treikam bha” ong u ma Pala haba jubab ïa ka jingkylli halor ka jingpynslem jongka sorkar pdeng ban ai rai ban pyntreikam ïa ka ILP ha ka jylla Meghalaya bad kumjuh ruh halor ka jingpynphai ïa ka Meghalaya Residents Safety and Security (Amendment ) (MRSSSA) Bill 2020 kaba la thaw kyrpang ban khmih ïa ka rung ka mih kiwei ki jaidbynriew shapoh ka jylla.
U la ong ban pynïeng ne thaw ïa kita ki khyrdop ha shilynter ki surok bah kam long kaba eh hynrei ban talasi ka long kaba eh tam. “ Lada pyndonkam da ki kor teknoloji nga tharai kam don jingeh. Kum ka nuksa, ha ki surok bah (National Highways) ki don ki khyrdop lum pisa ( check gates) man la ki jaka hynrei namar la pyndonkam da ki kor teknoloji kam don jingeh satia bad ki briew ruh ki lah ban shu siew da ka pisa ne lah ban shu pyndonkam da ki sticker ba la siew pisa lypa”.
“ Kumta kane ka long kumjuh ruh ha kaba ïadei bad ka jingtalasi ïa ki mynder. Donkam da ki kor technoloji namar ban talasi da ki briew ka long kaba eh haduh katta katta. Mynshwa don tang 10 tylli ki trok ba ïaid ha ka shisngi mynta ki don 10,000 tylli shisngi ki trok. Kumta ban talasi da ki briew ka long kaba eh haduh katta katta. Ngi dei ban pyndonkam beit da ki kor ki mashin bad lada lah ban buh ha ki khyrdop lum pisa, kan long kumjuh hi lada buh ha ki khyrdop talasi mynder ruh” ong u ma Pala.
U la ai nuksa shuh shuh “ Lada phi leit sha kiwei ki ri phin hap don ki Visa bad ïa ki Visa ym dei ban bishar da ki briew, ngi hap ban buh ïa ki passport bad ki Visa ha ki kor ki bor bad kin eksamin ne scan ïa ki QR Code bad hadien kata sa lah ban pynshisha la ki dei kiba biang ne ki bym biang ruh”.
Kane ka long kumjuh ruh ha ka jingtalasi mynder ne pyntreikam ïa ka ILP, lada pyndonkam da ki kor teknoloji ki briew ki lah ban aplai online bad hadien ba la ïoh bad haba wan sha Meghalaya ki hap ban shu buh ha ki machin ïa ki kot ki sla bad kan sa scan bad kin sa ïoh ban leit”. U la ïathuh ba wat ha Parliament ruh mynta ki la pyndonkam da ki kor ki machin ban ithuh ïa ki MP. ïa kine la pynïasnoh bad ki Aadhaar khnang ban ïoh ban rung shapoh Parliament.
U la ïathuh kum u MP u la rah bad kren ïa kane ka mat hapoh ka Parliament na ka bynta ban pyntreikam noh kloi ïa ka ILP ha ka jylla.
Ha kaba iadei bad ka MRSSAB u la ong ba ka sorkar ka dei ban bishar kano kaba biang bad kano ka bym biang. “ Namar haba phi wanrah ïa kano kano ka Bill ne ka Ain kam dei tang na ka bynta ki Khasi, Garo ne Bengalees hynrei ka dei lut ïa baroh bad ka dei ruh ban long hapoh ki kyndon ka Riti Synshar ka ri India. Kumta donkam ban bud nuska na ki aiñ kat kum ka riti synshar ka ri khnang ba kane ka Bill ne Ain kan ïoh jaka hapoh ka ri. Lada don ki jingduna donkam ban pynbeit bad ka sorkar ka dei ban shim khia hi ïa kane namar kane ka dei ka aiñ ba la wanrah da ka sorkar jylla bad lada wanrah ki jingpynkylla ha ki katto katne ki bynta khlem pep yn pdiang bad soi pynskhem beit ïa kane ka bill da u Lat ka jylla”.
