Byrngem pynbthei bom ki Lehnoh ha manla ki ïingbishar ka India kynthup ha Meghalaya

Shillong, Kyllalyngkot 6 : Ki Pulit jongka jylla Meghalaya ki la peitngor pyrkhing bha hadien ba la ïoh pdiang ïa kawei ka jingthoh lyngba ka mail myn ha ka Sngi Thohdieng kaba la byrngem da ka kynhun lehnoh ba ka la dep buh bom ha man la ki ïing Bishar jongka ri India kynthup ruh ha ka ïing Bishar High Court jongka jylla Meghalaya.
Ka ïing Bishar High Court jongka jylla ka ïoh pidang ïa kane ka mail ha ka por 5.45 baje mynstep jong ka Sngi Thohdieng.
Kat kum ki jingwad bniah la lap ba ïa kane ka mail la phah na ka Morguelol545@gmail.com ha kaba la kam ruh “ Nga la dep buh bom hapoh ki ïing Bishar jong baroh ka ri India. ïa kine ki bom la buh ha ka jaka ba rieh bha bad kin sa bthei ha ka por mynstep. Phin sa mad ïa ka jinglyngkien ka snam.
“Ngi dei na ka kynhun lehnoh kaba la tip kum ka Terrorizers111. Ai ïa ka kyrteng jong ka kynhun jong ngi sha ki Lad Pathai Khubor ruh ngin ym sangeh na ka jingleh ïa ki kam pyntriem jong ngi”
ïa kane ka Mail la phah sha baroh ki ïing bishar jongka ri India.
Na ka liang u SP ka East Khasi Hills u bah Sylvester Nongtnger u la ïathuh ba ki pulit ki la ïoh jingtip ïa kane bad ki la long kiba peitngor pyrkhing bha bad la bthah ruh ïa ki bor pahara ha ki ïing bishar ba kin long kiba peitngor bha ïa ka jingapphira jongki.
La ïathuh ruh ba ki bomb squad ryngkat bad ki ‘sew bud dien ki la leit mynta ka sngi sha ka ïing bishar High Court jongka jylla ban wad bniah ïoh don shisha kita ki jingbuh bom.