Pynkhlaiñ ki Pulit ïa ka jingpahara ha Tura bad Shillong ban wan ka President Murmu

Shillong, K’lyngkot, 06: Ka tnat Pulit jong ka Jylla ka la pynkhreh ban pynkhlaiñ ïa ka jingpahara ha nongbah Shillong bad ha Tura ha ki sngi shwa ba ka President jong ka ri India ka Droupadi Murmu kan wan iuhkjat ha ka 15 tarik bad 16 tarik mynta u bnai.
Ka Murmu kan leit iuhkjat shwa nyngkong eh ha Tura kaba dei ka district headquarter jong ka West Garo Hills District, ban plie paidbah ïa ka Meghalaya Games ka ban sa long ha ka 15 tarik mynta u bnai.
Ka jingpynkhreh jong ka tnat Pulit ban pynkhlaiñ ïa ka jingpahara ka long hadien ba ka seng kieng atiar Hynñiewtrep National Liberation Council (HNLC) ka la weng noh na ka miej jingïakren ïasuk bad ka Sorkar bad hadien ba kawei ka kynhun lehnoh kaba la tip kyrteng kum ka Terrorizers111 ka la phah ïa ka jingthoh lyngba ka email sha ki Ingbishar High Court jong ki Jylla bad kynthup ruh sha ka Ingbishar Meghalaya High Court da kaba byrngem ban pynbthei bom.
Kum ban shu pyntip hangne, ba ïa ka lympung ïalehkai Meghalaya Games yn sa pynkut noh ha ka 20 tarik mynta u bnai bad palat 3,000 hajar ngut ki nongïalehkai kin sa ïashim bynta ha ki 22 tylli ki jait jingïalehkai bapher bapher. Ka Sorkar Jylla ka la pynlut pisa palat T. 23 klur na ka bynta kane ka lympung ïalehkai.
Ha nongbah Shillong, ka President kan sa buh ïa u mawnongrim ban trei ïa ka Shillong Ropeway project ha ka 16 tarik mynta u bnai.
“Ngi la pan sa khyndai kynhun ki bor pahara ban peitngor ïa ka nongbah Shillong bad ban pynkhlaiñ ïa ka jingpahra ha ka sngi ba ka President kan wan iuhkjat ha Shillong,” ong uwei u heh Pulit.
Bun tylli ki jingïalang ladep pynlong na ka bynta ka jingwan jong ka President sha ka jylla.
Ha u snem ba ladep, ka jingaiti ïa ka jaka ha Shillong Peak na ka bynta ban tei ïa ka Shillong Rope Way project, la sakhi lang da u Myntri Rangbah ka Jylla u Conrad K Sangma.
La buh thong ban tei ïa ka ropeway project ha ka jaka kaba heh 1.34 hectare, ka jingmang pisa kaba kot T. 138.00 klur. Kane ka projek ka kynthup ïa ka Lower Terminal Point (LTP), ïa kaba la tyrwa ban shna na Forest Nursery Rait Laban ha ka jingjrong kaba 11146.96 sq. m bad ha kynjang kaba 838 mitar bad ban don ïa ka Station Building, Concourse, Maintenance Room, Ticket Room cum Office, Store Room, Security Room, Waiting Area, Public Convenience bad Parking Area.