Shillong, Kyllalyngkot 07: Ka kynhun Super Challengers lem bad ka Elite XI ki la khur namjop ha ka jingïalehkai ka lympung Shillong Cricket League 3rd division 2024 kaba la long hynne ka Sngi.
Haba phai sha ka jingïakhun kaba nyngkong hapdeng ka Youth Star pyrshah ïa ka Super Challengers, bad ïa ka toss la ïoh da ka Super Challengers bad jied ban bol nyngkong.
Ha ka Inning tied jong ka Youth Star, ka kynhun ka la kynjoh sha ka 135 shuwa ban shah pynhap baroh ki wicket na ki 19.1 over.
Napdeng ki rangtied kiba la kamai bun ron na bynta ka Youth Star ki long u Pranjal Dey (52 naki 45 bol) bad u Prantik Dey (21 ron naki 21 bol).
U Biplove bhowmick u la khur haduh 4 wicket na ki 3.1 over bad ailad tang 4 ron ban shah tied katba u Saurav Dey u la khur 3 wicket naki 4 over.
Haba beh ïa kane ka thong ba la buh, ka Super Challengers ka la pyndep tang ha ka 18.1 over ban kynjoh sha ka 136 bad hap 9 wicket bad khur ïa ka namjop da 1 wicket.
U Kerlang Nongrum u la tied 42 ron naki 19 bol, katba u Gaurav Dey u la kamai 25 ron naki 25 bol.
Napdeng ki rangkawangbol ka liang pyrshah kiba kham seisoh ki kynthup ïa u Pranjal Dey (4 over: ailad 15 ron bad khur 2 wicket) bad u Sagar Choudhary (4 over; shah tied 17 ron: khur 2 wicket) hynrei watla kata ruh kane kam shym la ïarap pyllait ïa ka kynhun na ka namrem.
ïa ka nam Player of the match ha kane ka jingïakhun la khur da u Biplove bhowmick u ba la khur 4 wicket.
Ha ka jingïakhun kaba bud hapdeng ka Elite xi pyrshah ïa ka lmya, ka LMYA ka la ïoh ban jied ban tied nyngkong hadien ba jop ïa ka toss.
Na ka liang jong ka LMYA ka la lah ban tied pyndep ïa ka 20 over bad kamai 173 ron hap da 3 wicket.
U Aditya Chodhary (63 ron naki 52 bol), u Saurab deb (58 ron naki 45 bol) ki dei ki player kiba la lah ban ïalehkai bha ban kyntiew ron ïa ka kynhun.
Napdeng ki rangkawangbol ka liang pyrshah kiba seisoh dei tang u Kunal Dey u ba la kawang 4 over shah tied 28 ron ryngkat bad u wei u wicket ba ïoh pynhap, nangta u Manish Joshi u ba la kawang 4 over, shah tied 43 ron bad khur 1wicket.
Haba beh ïa ka ron ba la buh da ka liang pyrshah, ka Elite xi ka la tied tam da 175 hap 8 wicket naki 19 over ban khur ïa ka namjop da 2 wicket.
U Arup Das u la tied mar shiteng ïa ka spah ron, kata da 55 ron naki 41 bol, katba u Jayanta Dey u la ïarap 34 ron naki 13 bol.
ïa ka nam Player of the match la khur da u Arup Das jong ka Elite XI u ba la kamai mar shiteng ïa ka spah ron.
