Shillong, Kyllalyngkot 07: Ka kynhun lehkai jong ka Shillong Lajong ka la pynkhreh bha ïalade ban jam sha ka Super Cup ha kaba ka kynhun kan sa hap ban aireng pyrshah ïa ka Kerala Blasters FC ha ka 10 tarik mynta u Kyllalyngkot ha ka por 2 baje nohphaisngi, ha Kalinga Stadium, Odisha, na bynta ka Kalinga Super Cup 2024.
Ha kane ka kynti ka la Lajong ka la shah pynhaplang ha kajuh ka thup ryngkat bad ki kynhun ba lehkai ha ka ISL, kiba kynthup ïa ka Kerala Blasters FC, ka North-East United FC, bad ka Jamshedpur FC, ha ka Group B jong ka lympung Kalinga Super Cup.
Ka kynhun kan mih ban leit sha Odisha naduh mynta ka sngi. Kane kan dei ruh ka lad kaba biang ïa ka kynhun ban pynpaw pyrthei ïa ka jingtbit jong ka, ha kaba kan sa aireng pyrshah ïa ka kynhun kaba kham shalor ban ïa ka, bad khmihlynti ruh ba kan wanrah ïa ka jingïakhun kaba itynnat pyrshah ïa kine ki klob ISL.
Ka Lajong ka dei kawei napdeng ki saw kynhun ba ïakhun ha ka I-League, kynthup ïa ka Sreenidi Deccan FC, Gokulam Kerala FC bad kawei na ki nongjop ha ka playoff hapdeng ka Rajasthan United FC bad Inter Kashi, ki ban aireng ryngkat bad ki 12 kynhun ka ISL ha kane ka lympung kaba don haduh 16-kynhun ba la phiah ha saw tylli ki Group..
Ka kynhun jong ka Shillong Lajong FC: Goalkeepers: Rajat Paul Lyngdoh, Neithovilie Calieu, Bishal Lama
Defenders: Ronney Willson Kharbudon, Kynsailang Khongsit, Allen Camper Lyngdoh Nongbri, Saveme Tariang, Daniel Goncalves, Kongbrilatpam Manjit Sharma
Midfielders: Hardy Cliff Nongbri, Ronaldkydon Lyngdoh Nonglait, Hamedamanbha Wahlang, Wadajied Kynsai, Ryngkhlem, Sangti Janai Shianglong, Renan Paulino De Souza
Forwards: Kynsaibor Lhuid, Denzil Kharshandi, El Hadji Abdou Karim Samb, Douglas Rosa Tardin, Laiwang Bohham, Pursunep Longkumer
