Ranji Trophy: San wicket khur u Dippu, lyngba ka inning sdang jingjop ka Meghalaya pyrshah ïa ka Arunachal

Shillong, Kyllalyngkot 07: Ka Meghalaya ka la lah ban synshar da ka namjop lyngba ka inning bad 172 ron ïa ka Arunachal Pradesh ha ka jingïakhun kaba nyngkong jong ka Jylla ha ka Ranji Trophy plate group kaba la long ha Anand, Gujarat, hynne ka Sngi.
U Dippu Ch Sangma u la lah ban tyngshaiñ bha ïalade ha ka inning tied kaba ar jong ka Arunachal Pradesh da kaba khur 5/54 ha kaba ka Jylla ka la khanglad ïa ka Arunachal Pradesh da tang 238 ron naki 84.5 over. Kane ka dei ka sien kaba nyngkong ïa u Dippu ban khur san wicket ha ki lympung lehkai BCCI domestic cricket, bad u la khur ruh 4/18 ha ka inning kaba nyngkong ban khylliap da 9/72 haba kyllumlang baroh inning.
Kumban shu pynkynmaw, ka Arunachal, ka la sdang ban tied nyngkong ha kane ka jingïakhun hynrei ka la shah pynhap noh da tang 94 ha ka inning ba nyngkong ha ka Sngi Thohdieng bad ka Meghalaya ka la pynthame da kaba kamai haduh 504 ron hap 9 wicket ha ka Inning tied ba nyngkong jong ka, bad ka jingai khublei ka long ïa ka 268 ron ba la khyrwit da u Kishan Lyngdoh (ka 200 ron kaba nyngkong ïa u player ka Jylla ha ka Ranji ban kynjoh) bad ka 132 ron ba la kamai da u Ram Gurung hynnin ka Sngi Saitjaiñ.
Watla ka Arunachal ka la ïalehkai bha ha ka inning tied kaba ar hynrei ka jingtbit ki rangkawangbol ka Jylla kam shym la ailad ïa kane ka kynhun ban kynjoh wat tang mar shiteng ïa kaei kaba ka Meghalaya ka buh tang na ka Inning tied ba nyngkong.
“Ai khublei ïa u Dippu Sangma na bynta ki san-wicket kiba u la khur,” la ong u President ka Meghalaya Cricket Association- Nababrata Bhattacharjee haba kren hadien ba la kut ka jingïalehkai. “Khamtam eh ka jing ai khublei ïa ka namjop kaba i shongkun ba ka MCA ka la khur.”
Na ka liang jong ka Arunachal, ki la don katto katne ki player kiba la lah ban lehkai bha ban pynneh kham slem ïa ka jingïalehkai.
Dei lyngba u Dippu ba ka Meghalaya ka la pyndkut noh ïa ka jingskhem paralok ki shijur ka Arunachal (kiba la kamai 62 ron shuwa ban hap u wicket ba lai) bad dei u Dippu u ba la pynhap ïa u Techi Neri( player ka Arunachal ba kamai 46 ron).
Kiwei pat ki wicket la khur da u Md Nafees (2/23), u Ram (1/18) bad u Arbin Singh (1/50).
Ka Meghalaya mynta kan wanphai ban pynkhreh ïa ka prokram ïakhun ba ar pyrshah ïa ka Hyderabad ka ban sdang naduh ka 12 tarik mynta u Kyllalyngkot ha MCA Ground, Polo. Ka Hyderabad, ka kynhun ba ka Jylla kan sa aireng, ka la jop suk lyngba ka inning bad 194 ron pyrshah ïa ka Nagaland.
Bad na ka liang jong ka Meghalaya ka khmihlynti ban ai ïa ka jingïakhun kaba itynnat bad kaba jwat na bynta ka Hyderabad ynda kine ki arliang kin sa ïatyngkhuh ha ka 12 tarik.