K a jylla Meghalaya ka dei ka jylla kaba U Blei U la kyrkhu kyrpang khamtam lada phai sha ki sawdong sawkun jong ka Mariang lah ban ong ba kham ñiar ban don kum ha kane ka jylla. Ha ka juh ka jylla ngi don ki jaka ba don ka jingshit kum sha kiwei ki jylla kata sha ri Lum Garo bad ha kajuh ka jylla ka don ka jaka ba Khriat ha ka por Tlang bad Pyngngad ha ka por Lyiur bad kata ka dei hangne ha Ri Lum Khasi bad Jaintia.
Ym tang katta kat shaba phai ne kat shaba leit ki Lum ki Wah ba itynnad ki ker sawdong ïa kane ka jylla. Na kata ka daw ki briew kiba nabar ki tang shu wan poi ha kane ka jylla ym tang ba ki iap bieij hynrei ki jawdud bad kwah syndon ban im ban sah namar kat sha ba phai dap da ki jingitynnad suda. Lehse na kane ka daw balei ba kiwei ki jaidbynriew ki kwah ban wan trei wan ktah bad lada ïoh lad wat ban sah duh ha kane ka jylla ruh da kaba shu wan sah beaiñ ruh namar ka jingitynnad jongka.
Lada ngi phai pat sha ka jingsumar sukher ïa ka mariang ngi ïohi ba kam don shuh ha kine ki sngi, ki lum ki wah kiba bun ki la syllen lut, ym don dieng don siej shuh kaba la buh pat ïa kane ka jylla ha ka jingma kaba lah ban poi shaduh u pud ban tyrkhong um ha kawei ka por. Namar ki phud wah kiba dei ki tyllong um ki la syllen lut ki khlaw ki btap. Hooid ki jaka puta ha kane ka jylla ki dei jong ki riew shimet. Hynrei tang namar ba ki dei jong ki riew shimet kam mut lah ban pynjulor khoit ïa ka mariang da kaba pom pathar lut ïa ki dieng ki siej ne pynkhyllem ïa ki dieng ki siej ban rep ban riang ne rep bun. Kynmaw kum ki trai jaka puta dei ban pyrkhat ïa ka lawei jong ki pateng ki khun ki kti ruh namar lada ngi pyrkhat tang ïa ka mynta shano pat ka lawei kan poi.
Sa kawei pat ruh, na ka por sha ka por la ju ïai kren la ju ïai pyni bad ïai pynkynmaw ba haba leit kai sha lum sha wah ne kino kino ki jaka jngohkai kiba leit kim dei ban bret pathar ïa ki plastic, ki bilor kyiad, beer ne ki jakhlia jakhlait hynrei haduh mynta ïa kane ym lah ban pynduh. ïa kane lah ban ïohi khamtam ha kine ki por ba dei ka por leit bam khana sngewbha sha lum sha wah da ki long ïing longsem, ki shnong ki thaw, ki Balang,ki Kynhun bapher bapher bad kumta ter ter. La ju lap bad shem ba ki jaka ba leit bam khana ki dap da ki plastic, ki jakhlia bad ki bilor.
To sieh ngin ïa pyrshang ban kham sumar ïa ka mariang da kaba ngin ym bret pathar ïa ki plastic, ki bilor, ki jakhlia khnang ba ka mariang kan dang phuh dang phieng bad dang khring shuh shuh ïa ki nongwan jngohkai kaba long ka jingmyntoi ïa ngi hi ki trai jylla. Hynrei lada ngim kylla bamut ym slem shuh ki jaka jngohkai kin sa kylla kynjah noh namar lada dap da ki jaboh, ki jakhlia, ki plastic bad ki bilor mano ban dang kwah ban leit sha kum kita ki jaka. Ki nongwan jngoh kai kin wan tang shisien bad ha ka jaka ba kin pynphriang ïa ka khubor ba bha sha kiwei kiba kwah ban wan khlem pep kin pynphriang da ka khubor kaba ym sngewtynnad kaba kiba kwah ban wan ruh ki la ngiah noh. Hato kane kam dei ka jingduh nong ïa ngi hi.
Ha kito ki jaka jngohkai ba la lum da ki pisa ki dei ban don ki valunteer ki ban ïaid sharum shaneng ban peit ba kiba wan sha ki jaka jngohkai kim dei ban bret pathar ïa ki plastic, ïa ki bilor, ïa ki jakhlia. Nalor kata sa kawei kaba donkam tam ka long ba ha man la ki jaka jngohkai ka tnad kam jngohkai lane kito kiba dei ki jaka jong ki riew shimet ki la dei ban shna da ki paiñkhana kiba bha bad kiba biang ka um khnang ba kiba wan jngoh kai kin ym hap leit pathar sha khlaw sha btap hynrei kin ïoh ïa ki jaka leit bar kiba biang namar lada biang bad khuid ki nongwan jngohkai kim salia wat lada hap ban siew da ka dor ruh.
