Khliehriat Kyllalyngkot 07: Ka jingïalehkai phutbol kaba la tip kum ka “2nd RYC Bataw Knockout Football Tournament 2023-24” kala poi sha kaba kut (Final) myn hynnin ka sngi 6 tarik ïa kaba la pynlong ha madan Lacheh Playground Bataw ha ka por 1 baje nohphai sngi.
Ïa kane ka lympung ïalehkai phutbol la wan pynhap pyrda da u J. Mairom, Additional Superintendent of Police, East Jaiñtia Hills District Khliehriat kum u Kongsan, haka jingdonlang ki nongïalam ka Shnong Bataw kiba long u Skem Sumer Waheh Shnong, u Bhalang Suchiang, Chairman Shnong, u Ampli Rupsi Secretary Shnong uba dei ruh u Secretary ka Club, ki riew rangbah kiba la shah khot sngewbha nalor ki nongïalam bad ki dkhot ka Club.
Ïa ka jingïalang la pynïaid da u Deihok Sumer, President ka Rumshnong Youth Club Bataw bad la ïoh ka jingkren lyngkot na u Skem Sumer, Waheh Shnong Bataw uba la mynsiem ïa ki nongïalam ka Club ba ki la lah ban pynlong ïa kane ka lympung baheh hapoh Shnong bad ha ka thaiñ hi baroh kawei.
U Kongsan haba ai jingkren ula ïaroh ïa ka Rumshnong Youth Club Bataw kaba la lah ban pynlong ïa kum kane ka lympung ïalehkai phutbol kaba long ka jingkyrkhu ïa ki khun samla kiba don ka sap ka phong ha ka kam ïalehkai phutbol bad kaba long shi bynta ka jingkilan met kaba wanrah ïa ki samla sha ka jingbha ïa ki samla ba kin lait na ki jingmyllien ba sniew ha ki jingdih ba pynbuaid kum u drok, u kynja bad kumta ter ter.
Ha kane ka jingïalehkai phainal kaba la long hapdeng ka Umsyiem FC Bataw pyrshah ïa ka War United FC ka long kaba itynnad bha bad ki nongkyrshan na baroh arliang ki ïa ap khmih ban jop ka kynhun jong ki, hynrei ynda la poi haka minit kaba 3 ka Umsyiem FC lyngba u Ejingmut Dkhar Jersey No.13 ka la ïoh ban thep ïa ka kol bad da ka jingïaleh shitom ka War United FC ka la ïoh pat ban pynphai kylla ha ka minit kaba 29 minutes lyngba u Chanlemmiki Khongwang Jersey No.10.
Te ka jingïalehkai ka long kaba ïakhaid bha bad ka por kala kut te u referee u hap ban pynlong da ka Tie Breaker bad ka Umsyiem FC kala jop pyrshah ïa ka War United FC da 4-2 kol.
Lyngba kane ka jingjop jong ka Umsyiem FC Bataw kum ka lahduh ka ïoh rah ïa ka song pisa kaba Rs.60,000/- hajar ryngkat bad ka Trophy bad ka War United FC ka kynhun ba wan baar ka ïoh rah ïa ka song pisa kaba Rs.40,000/- hajar ryngkat bad ka Trophy.
