Da kaba tyngeh halor ka jingjia ha Lapang, dang bishar ka sorkar kyrshan ïa ki longïing ba shah ktah

Shillong, Naitung 13 : U Myntri Rangbah ka jylla, Conrad K. Sangma, u la kular ba ka Sorkar kan shim ïa ka sienjam kaba tyngeh pyrshah ïa kiba donkti ha ka jingjia kaba la shim ïa ka jingim jong ki san ngut ki nongbylla ha Lapalang.
Ha kajuh ka por pat u la ong ruh ba ka Sorkar ka dang bishar ïa ki lad ki lynti ban ai jingïarap ïa ki longïing kiba la duh noh ïa la ki bahaiing.
Haba kren sha ki lad pathai khubor, u Myntri Rangbah u la ong ba ki kyndon bad ki aiñ ki la don lypa, bad kino kino kiba pynkheiñ ïa ki kin hap ban kitkhlieh katkum ka aiñ.
“Yn shim ïa ka sienjam kaba tyngeh pyrshah ïa kiba leh ïa kine ki kam. Ki la don ki kyndon bad ki jingmana lypa, hynrei lada don kiba pynkheiñ ïa ki, ki la pynkheiñ ïa ka aiñ bad yn leh katkum ka aiñ pyrshah ïa ki,” la ong u Myntri Rangbah.
U Conrad u la ong ba kiba la duh noh ïa la ka jingim ha kane ka jingjia ki dei na ki longïing kiba duk bad kiba duna ka jingïoh ka kot. Kumta ka Sorkar ka dang wad ïa ki lad jingïarap kiba lah ban ai sha ki bahaïing jong kiba la khlad.
“Ngi dang bishar ïa ki lad jingïarap namar kiba la khlad ki dei na ki longïing kiba duk bha. Kumta nga dang peit bniah kumno ngin lah ban ai jingïarap ïa ki,” u la ong.
U Myntri Rangbah u la ïathuh ruh ba u la ïoh pdiang ïa ki shithi na ki dkhot jong ka National People’s Party (NPP), kynthup na ka Nongthymmai Unit bad na kiwei pat ki Unit ha ki Constituency bapher bapher, kiba la kyrpad ïa ka Sorkar ban ai jingïarap ïa ki longïing kiba shah ktah.
Hynrei u la pynpaw ba katkum ki kyndon jong ka Disaster Management, ym don bynta ba kdew shai ban ai jingïarap ha ki jingjia kum kane. Watla katta, u la ong ba namar ka jinglong jong ki longïing kiba shah ktah, ka Sorkar kan bishar bniah ïa ka kam bad kan shim ïa ka rai kaba dei.
Lah ban kdew ba ha kane ka jingjia kaba sngewsih ha Lapalang, san ngut ki nongtrei ki la duh noh ïa la ka jingim hadien ba ki la ring mynsiem ïa ka lyer jaboh kaba mih na ka generator katba ki dang tan um na ka pung um.