Da ka um lap ka longkmie ba pyndap ha u Cylinder LPG, ujor ejahar ha Nongpoh PS

Nongpoh, Nailar 10: Ki kam thok kam shukor bad lehse kawei na ki kam bamsap kaba shyrkhei ha kaba ïadei bad ka jingsam ïa ki tyndong lyer shet jingshet ne ki Cylinder LPG ka la paw pyrthei ha ka sngi Saitjaiñ hadien ba kawei ka longkmie na ka shnong Sohlait Thymmai, Ri-Bhoi ka la da ka ejahar ha Nongpoh Police Station hadien ba ka la kynnoh ba u tyndong lyer shet jingshet ba ka ju pyndonkam bad neh kumba shi bnai eiei manla ka por u la lut noh tang hapoh ar taiew eiei.
Ïa kane ka jyrsieh bamsap bad ka jingleh tuh ha kaba ïadei bad ki tyndong lyer shet jingshet la lap da ka Kong Marian Syngkli kaba la ïathuh ruh ba manla ka por u tyndong lyer shet jingshet u neh kumba shi bnai hynrei ha u bnai Jylliew ka u tyndong lyer shet u la lut noh tang hapoh ar taiew hadien ba ka la ïoh pdiang ha ka 11 tarik bad lut noh ha ka 24 tarik bad ïa kine ki tyndong lyer shet jingshet la sam da ka Ri-Bhoi Gas Agency.
Ka jinglut kloi jong u tyndong lyer sher jingshet, ka la pynlong ïa ka Kong Marian Syngkli ban don ka jingsuba sniew bad haba la pyrshang ban khmih bniah la shem ba ka don ka jingsawa jong ka um kaba bun shapoh u tyndong.
U tyndong lyer shet uba dei ban khia tang 15.2 kilo ryngkat ka Gas, hynrei wat hadien ba lut ruh ka jingkhia ka dang don sa 19.80 kilo ha kaba la lap ba la shu thep da ka um hapoh u tyndong.
Halor kane ka kam thok kam shukor, ka Kong Syngkli ka la kyrpad ïa ki bor jong ka aiñ ban leh eiei khnang ba ki paidbah kim dei ban ngat ha kum kane ka kam thok bad ka jyrsieh bamsap ba la leh da mano re mano ban khwan myntoi da kaba thok bad shukor ïa ki paidbah.