Da ka tulop MLA nohsynñiang u Bah Sanbor ban pynkup burom ïa ki khynnah lehkai ba duna dkhot met

Shillong, Naitung 15: U Bah Sanbor Shullai-MLA jong ka South Shillong ha ryngkat ka jingïatreilang bad ka Raid Laban Sports Social and Cultural Organisation, ki la pynlong ïa ka prokram pynkup burom ïa katto katne ki khynnah kiba don jingduna ha ki dkhot met kiba la seisoh ha ki rynsan ïalehkai (Para Arm-wrestlin) ym tang ïa ka jylla hynrei ïa ka ri ruh kumjuh bad kiba la pass ha ki jingpule.
Kane ka prokram la pynlong ha ka 13 tarik u Naitung, 2024 ha State Convention Centre, Shillong bad la wan ban ïashimbynta da ki nongmihkhmat jong ki skul bapher bapher, ki kolej, ki dorbar shnong, bad ki seng treimon sngewbha jong ka 19th South Shillong Constituency lem bad ki kmie ki kpa jong kine ki khynnah kiba don jingduna ha ki dkhot met.
U Bah Sanbor Shullai da ka mynsiem ba sngewkhia u la nohsynñiang da ka tulop MLA kaba shibnai (2 lak) sha kitei ki khynnah kiba na Fernando Speech and hearing centre, Umniuh- khwan Ri-bhoi District / Bethany Society School Laitumkhrah Shillong/Jyoti Sroat School Laitumkarh Shillong/ bad na Lumparing Vidyapith Secondary School Shillong.
Na ka liang jong u Bah Sanbor Shullai ryngkat bad ki dkhot jong ka Organisation ki la kular ban ïai bteng ban ai ka jingkyrshan ïa kum kine ki khynnah. Ka kyrteng jong kine ki khynnah kiba la shah pynkupburom ha katei ka sngi ki kynthup ïa ka: Prisca Pyngrope jong ka Bethany Society School Shillong, ka ban mihkhmat ïa ka Meghalaya sha ka 26th world Para Arm wrestling Championship 2024 ban sa long ha Moldova, ha kaba ka la ïohpdiang ïa ka song khusnam haduh 1,00,000/.
Katba 4 ngut ki ban sa leit ïashimbynta sha ka National Para Arm wrestling competition 2024, ki la ïoh jingïarap mar 20 hajar tyngka, kine ki kynthup ïa u Skhemlang Lyngdoh Nonglait, ka Aisilda Thabah, ka Syrpailin Wahlang, u Novenius Royki Dkhar kiba dei na ka Ferrnando Speech and hearing centre, Ri Bhoi District. Nangta ka Ankita Das jong ka Lumparing Vidyapith Secondary School Shillong.