Shillong, Rymphang 10 : Ka JSU Labang Nongphyllut ka la pynlong ïa ka tamasa pynneh pynsah la ka riam tynrai kaba ar sngi ha ka shnong Lamarang Block-1, ha kaba bun bah ki paidbah nongshong shnong kila wan ban ïashim bynta.Ha kane ka tamsa kaba ar sngi la pyninam ïa ki bam tynrai, ki riam tynrai, ki jingïathuh khana pateng, bad kila don ruh ki jingïalehkai katkum ka tynrai jong ki ha kine ki ar sngi ha ryngkat ka put ka tem tynrai. Kiba la wan ban ïashim bynta ha kane ka tamasa kaba ar sngi ki dei na kito ki shnong kiba hapoh ka Elaka Labang Nongphyllut, kane ka tamasa ka long ka jingplie lad ïa ki briew ka thaiñ ban pynneh pynsah ïa ki riam tynrai.
Shuwa ban sdang ïa ka jingpyninam tynrai la sdang ïa ka jingïalang ha kaba la pynïaid da u samla Elias Lamare symbud president ka Labang Nongphullut, la kren pdiang sngewbha da u samla Ïoanis Lin Talang bad ha kine ki ar sngi la donlang ki nongïalam ka sengkmie.Kane ka Tamasa ban pynneh pynsah ïa ka riti dustur jong ka thaiñ Labang Nongphyllut ka dei ka sien kaba ar mynta u snem ïa kaba la pynlong da ka JSU jong katei ka thaiñ ha kaba ki paidbah kila wan bna ïashim bynta.
