Da ka syrnot thok ba la ïap pyndonkam ki nongkitkam VEC ban sei ka bai bylla uba dang im

Shillong, Naiwieng 25: U nongtrei monsngewbha u Greneth M Sangma ha ka sngi nyngkong u la phah ka jingujor hapoh ka ophis Deputy Commissioner jong ka North Garo Hills halor ka jingkynnoh pyrshah ïa ka jingshna ïa ka death certificate kaba thok da u Secretary ka VEC u Jewilson Sangma uba na Chorebolbok bad u Laston Momin Sorder na kane ka shnong kaba hab hapoh ka Bajengdoba police station.
Ha ka shithi ba u la phah u Sangma u la ong bad a kane ka syrnot kaba thok la pyndonkam ban sei ïa ki bai bylla jong u Rilipson Marak, uba dang im bad uba trei haduh mynta ha Chennai.
U la ong ba katkum ki kaiphod ki lad pathai khubor, ka tnga jong u Rilipson Marak ka la ïathuh ba u tnga jong uba la trei bad uba dei ban ïoh ka bai bylla hapoh ka job card jong u ha shwa ba un leit sha Chennai bad bynrap ba kane ka pyni shai ba kane ka syrnot ba la ïap ka dei kaba la leh thok bad kitei ki briew kiba la shah kynnoh ki la leh ïa ka kam runar kaba shyrkhei bha.
“Namarkata nga kyrpad ïa phi ba phin peit ïa kane ka kam bad nga dawa jur ba ïa ka FIR dei ban ujor mardor pyrshah ïa u Jewilson Sangma bad u Lastone Momin Sorder hapoh ki kyndon jong ka aiñ naba ki shna bad pyndonkam ïa ka kot kaba thok. Nga kyrpad ruh kumjuh ba dei ban shim kam da kaba phah kem ïa kitei kiba la shah kynnoh bad ban pynïoh ïa ka jingbishar bad ka hok ïa utei u lanot,” u la ong ha ka shithi.