Nongpoh, Naiwieng 02 : Ban phai khmat lem ïa ki jingdonkam ki paidbah bad ruh shi bynta ban ai burom ïa u la u jong u kpa kum uwei na u rangbah uba la noh synñiang na ka bynta ka bha ka miat jong ka Shnong Saiden ha Ri bhoi District., ka ïing ka sem jong u Bah Evansis Jones Myrthong da ka jingsbun mynsiem ki la pynshna ïa kawei ka sem ap kali paidbah (Passenger shed) na ka bynta ka shnong Saiden, kaba dei kawei na ka shnong kaba don ha Ri Bhoi District.
Na ka liang ka ïing ka sem jong u Bah Evansis Jones Myrthong ki la pynshna sngewbha ruh ïa kane ka sem ap kali paidbah ha ka shnong Saiden ka long ban ai burom ïa u kpa jongki, u (L) Stenshon Lyngdoh, uba la bam kwai ha dwar u Blei bad ruh kum ka jingïarap na ka bynta ki paidbah nongshong shnong shnong ba ki ioh ban pyndonkam ïa katei ka sem ap kali ha ka por ba ki leit jingleit na shnong sha kiwei ki jaka ban ap kali paidbah.
Ka long ruh ka sngi sah jingkynmaw, ha kaba mynta ka sngi hadien ba la dep ban shna ïa katei ka sem ap kali, na ka liang ka Dorbar Shnong Saiden mynta ka sngi ka la plie paidbah bad ot ribbon noh ïa katei ka Sem ap kali paidbah shuwa ba ki paidbah kin ioh ban pyndonkam ïa ka. Ïa kane ka sem ap kali paidbah la plie paidbah hi da u Rangbah Shnong ka Shnong Saiden, u Bah E.K Lapang ha ryngkat ka jingdon lang ki riew rangbah ba kynthup ïa u Bah M.G Kharshanlor, u Bah Evansis Jones Myrthong, Secretary Shnong, u Bah Habamut Lyngdoh, President ka Seng Samla, ki Longkmie bad ki paidbah. Ïa ka jingïalang la pynïaid da u Rangbah Shnong barim ka Saiden, u Bah S.F Lyngdoh. Haba ai jingkren ha kane ka sngi, u Rangbah Shnong ka Saiden, u Bah E.K Lapang u la pynpaw ïa ka mynsiem jong ka jingkmen halor ka jingkylluid mynsiem jong ka ïing ka sem u Bah Evansis Jones Myrthong kiba la pynshna ïa kane ka sem ap kali ki paidbah bad kane kam dei tang ban kynmaw burom ïa u kpa jong ka ïing ka sem jong ki, hynrei lyngba ka jingdon kane ka sem ap kali kan ai jingmyntoi ïa ki paidbah Nongshong shnong.
Shuh shuh, ha kawei ka bynta na ka liang ka Dorbar Shnong ki ai ka jingkhublei ïa ka ïing kasem jong u Bah Evansis Jones Myrthong ba kin dang lah ban leh shibun ki kam ba bha na ka bynta ka imlang ka sahlang bad ha kawei ka bynta u la kyntu ruh ïa ki paidbah nongshong shnong ba kin pyndonkam hok ïa kane ka sem ap kali na ka bynta ka jingdonkam ki paidbah bad ym ban pyndonnkam bakla ïa ka, u la bynrap.
