Da ka Red Ribon Club Festival pynlong ha Khliehriat ban ïalap ïa ka jingshyrkhei ka HIV/AIDS bad u Drok

Khliehriat, Nailar 1: Ka Jaiñtia Eastern College, Khliehriat ha ryngkat ka jingïatreilang bad ka Meghalaya AIDS Control Society (MACS), Shillong, ka Kyrmen Foundation, Lad Rymbai, ka Jaiñtia Hills Cement Manufacturers Association, Thangskai ba la kyrshan lang ruh da ka Meghalaya Cooperative Bank, Khliehriat Branch bad ka Canara Bank, Khliehriat Branch, ka la pynlong ïa ka tamasa ba ar sngi lynter kata ha ka 28 tarik bad 29 tarik u bnai naitung, kane ka tamasa lane ka festival ka dei ka jingïalap paidbah khamtam sha ki samla ban pynsngewthuh shaphang ka jingshyrkhei u drok, kumjuh ruh shaphang ka jingpang HIV/AIDS “Long kiba ioh mynsiem bad kam kynti ïa ka lawei” ki dei ki kyntien phira ha kane ka prokram kiba ai mynsiem ïa kito kiba la duh jingkyrmen bad ruh lyngba ki jingiakop bapher bapher kin kyrsiew bad pynkhlaiñ pat ïa ki jingmut jingpyrkhat jong ki samla ban tei ïa la ka lawei.
Ïa kane ka prokram la pynlong ha Jaiñtia Eastern College Khliehriat, la wan ban plie da u Deputy Commissioner ka East Jaiñtia Hills District, u Abhilash Baranwal, IAS kum u kongsan, ha ka 28 tarik, haba kren ha ka jingïalang u la ong ba “Ngi im ha ka imlang ka sahlang, don la ka jong ka bynta ban leh ban wanrah ïa ka jingkylla dur da kaba sdang naduh ba sdang” u la ai mynsiem ïa ki khynnah pule ba ki dei ban tip kaei kaba sniew bad kaei kaba bha, ki dei ruh ban da shim khia bha ban sumar ïa ka koit ka khiah bad ruh ba kin long kiba jop ha ki jingialeh ban jop ruh ïa kaba sniew.
Ha ka 29 tarik, u bah Wailad Shylla, uba dei u MLA 2-Jowai, u la wan ban long kongsan, haba kren ha ka jingialang, utei u nongmihkhmat na Jowai, u la ai ka jingkhublei bad ai ka jingïaroh ïa kiba la pynlong ïa kum kane ka prokram kaba don jingmut, u la ai ruh ka jingkhublei ïa baroh ki samla pule kiba la wan ban ïashim bynta ha kane ka tamasa ba la pynlong ha kine ki ar sngi bad u la kyntu ruh ïa ki samla ba ki dei ban pyn saphriang ïa ka khubor ha kaba ïadei bad ka HIV/AIDS bad kiwei kiwei ki jait jingpang khamtam ha ri lum Jaiñtia ba kane ka HIV/AIDS ka la kiew, ha kajuh ka por u kyntu bad pynshlur ruh ïa ki samla ba kin shim ïa ki synjam ha kaba ïadei bad ka iohkam iohjam da kaba seng ïa ki kam la jong ban long ruh kita ki nong ai kam sha kito kiba wad kam.
Na ka liang i Asst. Professor History Department, i Prof P. Syrpailin Phawa, i la ai ïa ki kyntien lamphrang halor ki kyntien phira kaba dei ruh ka phangpdeng jong ka prokram na ka bynta ki samla, i la ong ruh ba ki samla ha kine ki sngi ki ïakynduh shibun ki jingeh kiba ki hap ban ïakhun pyrshah ha ka jingim jong ki, hynrei wat hapdeng kiba bun ki jingeh ki samla kim dei pat ban duh jingkyrmen hynrei ki dei ban long kiba la pynkhreh bha ban ïakhun pyrshah ïa ki jingeh da ka mynsiem ba shlur.
Kiba la ai jingkren ki kynthup ruh, u Principal, Jaiñtia Eastern College Khliehriat, u Dr. P. Nongtdu, ka Nodal Officer, RRC jong ka JEC, ka kong F.Dalam Lytan, ka Dr. B.Decruse, kaba dei u Project Director, MACS, Shillong, ka Dianghun Shadap, kaba dei ka Asst Professor, English department, u Prof Bestarwell Dkhar, u Prof. D.S. Diengdoh.
Ha kane ka tamasa la wan ban ïashim bynta da ki khynnah pule jong ki phra tylli ki college na West bad East Jaiñtia Hills, ki khynnah na ki hynñiew tylli ki skul baroh kiba poi sha kane ka prokram ki don 502 ngut lem bad 16 ngut ki nonghikai bad 48 ngut kiba la shah khot sngewbha kynthup na East Bad West Jaiñtia Hills District.
Ki jingïalehkai skit bad drama, ki quiz bad bun jait ki jingiakop ha kane ka prokram ba ar sngi lynter ki dei beit halor ka phang ba pashat jingtip shaphang ka jingpang HIV/AIDS ka STI/RTI bad ka jingma kaba mih na ka jingkyrni dih drok, ha kajuh ka por ki skit, ki drama bad kiwei kiwei ki prokram ki ai jinghikai ruh halor kumno ban jop ïa ki jingpynshoi ba sniew bad ki ai mynsiem ruh ba jop ïa u drok, ban jop ïa ka jingshongkha pathar bad kumno ban rat diengkhong ïa ka jingpang HIV/AIDS bad ruh kumno ban kyrshan lem ïa kito kiba don ïa ka jingpang HIV/AIDS da kaba ai mynsiem lem ïa ki, ym ban peit i beiñ ïa ki hynrei ban ïasyllok ïa ki ba kin ïoh pat ïa ka lawei kaba bha.
Hapoh kitei ki ar sngi la pynlong ruh ïa ki prokram bapher bapher kum ki jingïalehkai skit bad drama ha ki hynñiew tylli ki jaka ha Khliehriat bad ha Ladrymbai, kum ki drama, ki skit, ki jingshad tynrai bad la pynlong ruh ïa ka Abhivyakti – The Red Show (Drama), ïa kane la pyniaid da i kong Rinibeth Patlong, iba dei i Programme Manager jong ka Mihmyntdu Community Social Welfare Association (MCSWA), Khliehriat bad i la ai ruh ki jingkren bad jingpynshai shaphang ka jingpang HIV/AIDS kata ha shwa ban sdang kane ka jingiakop Red Shows.
Kiba la jop ha kane ka jingïakop Abhivyakti (The Red Show) ki long ka Shangpung College, Shangpung kaba la ïoh rah ïa ka nam lah duh, ka Riwar Jaiñtia College, Amlarem, ka la ioh rah ha ka kyrdan ba ar bad ka Jaiñtia Eastern College, Khliehriat ka ioh rah ha ka kyrdan ba lai.
Ha kine ki ar sngi la ioh ruh ïa ka jingkren na u Asst Professor of Don Bosco College, Byndihati, u Prof. Sevendar Dkhar, kaba long kum ka jinghikai halor ka Personality Development bad ki kyntien ba ai mynsiem ïa ki samla pule.
Ka la don ruh ka jingïamareh Marathon kaba 5 km ba la tip kum ka Red Run kaba la ïa shim bynta da ki 183 ngut ki samla pule ha kaba u Sub-Inspector jong ka Khliehriat Police Station, u bah James Dkhar, u la pyllait ïa ka lama marathon.
Ka la don ruh ka jingpyni Yoga ba la shimbynta da ki samla pule na ki college bad ki skul bapher bapher na East bad West Jaiñtia Hills District.
Kiba la jop ha ka Quiz ki kynthup u Babidol Bareh bad ka Kyrmenlang Pala kiba pule ha Jaiñtia Eastern College ki la rung ha ka kyrdan ba nyngkong, katba u Heiyootremi Syngkon bad ka Deiniroy Mukhim kiba na Kiang Nangbah Govt. College, Jowai ki la rung ha ka kyrdan ba ar bad u Mutbha Lapasam bad ka Lanami i Daka Susngi kiba na Thomas Jones Synod College, Jowai ki la rung ha ka kyrdan ba lai.
Ki bor pyniaid jong katei ka Red Ribon Club, ki la ai ruh ïa ki syrnot sha kito kiba jop ha ki jingiakop bad ki la ïathuh ruh ba kito ki samla kiba la ia shim bynta ha kane ka Red Ribon Club Festival kiba la jop ha ki jingiakop bapher bapher kin sa leit ban mihkhmat bad ïa shim bynta ha ka State Level Red Ribon Club ka ban sa long.