Nongpoh, Jymmang 26: Ba ai jinghikai bad ban pynsngewthuh ïa ki paidbah halor ka jingma kaba la ap na ka jingktah jong u drok ba la sdang ban kynrei ha kine ki sngi, ka Ri Bhoi Presbyterian Synod Christian Endeavour ka la shim khia ban phai khmat na ka bynta ban ai jinghikai kumno ba ki khun samla kin kiar na u Drok uba dei uwei na u jingdih ba sniew ba la pynjot ïa bun ki samla ba lui lui.
Na ka liang ka Ri Bhoi Presbyterian Synod Christian Endeavour ha ka 25 tarik u Jymmang 2022 ka la pynlong ïa ka prokram ai jinghikai ha Ingmane ka Balang Presbyterian Nongpoh bad ka jingthmu jong kane ka prokram ai jinghikai ka long ban pynshai ne ïalap halor ka jingktah jong u drok ba kum ki khun smala ki dei ban kiar rai maw rai ding.
Ha kane ka prokram ai jinghikai la don ryngkat ruh u Principal ka RBP Higher Secondary School, u Babu W. Radu, ki nongkitkam ka Synod CE Union, ki nonghikai bad ki khynnah skul ka RBP Higher Secondary School, Nongpoh.
U Bah Shem Marbaniang, uba dei u Counselor ka KJP Synod Sepngi, iba ju don bynta ban ai jinghikai halor ka jingktah jong u drok u la long u nongai jinghikai ba hakhmat ha kane ka prokram kaba u la kren shibun ki bynta kiba shah ktah ha drok bad u drok u la pynjot bun ki khun samla ba lui lui namar ka jingbakla ïaid lynti ha ka jingim.
Na ka liang u Bah Shem Marbaniang u la ai ruh ka jingbatai kaba bniah shaphang ka jingktah u drok khamtam ïa ki samla kiba dangkhie dangsan ba kim dei ban shah pynbiej ne ngop ha kine ki jingdih basniew kiba ktah ym tang ïa lade shimet bad wat ïa ka ing ka sem bad ka imlang ka sahlang.
U la ong ruh ba shisien ba la kynni ha u drok ne ki jingdih ba sniew la shitom ban lait bad sa tang ka jingjynjar ïa u briew shimet, ïa ka ing ka sem bad ka imlang ka sahlang. Kumta u la kyntu jur ïa ki khynnah skul ne ki samla ba kim nym mad ïa ki jingdih pynbuaid khnang ban lait na ka jingsaja ha ka jingim.
