Nongpoh, Risaw 24 : Ka long ka nuksa bad ka jingai mynsiem ïa kiba bun ki shnong khamtam ïaki Village Organisation ba kam don jingeh ban ioh ïaka ophis treikam ba pura lada ki longkmie bad ki bor shnong ki don ka jingsngewthuh jingmut bad ka jingïatreilang, ha kaba kawei ka Village Organisation haka shnong Umsawlum ha Ri-Bhoi kaba la tip kum ka Nangiaisan Village Organization mynta ka 24 Risaw kala ioh ban plie paidbah ïaka ophis treikam jong ka kaba la tei lyngba ka skhim MNREGA bad SRWP.
Ïa katei ka ophis treikam la tei haka rukom kaba itynnad bala mang pisa kumba 10 Lakh ba kynthup 8.5 lakh naka skhim MNREGA bad 2 lakh naka skhim SRWP, bala plie paidbah mynta ka sngi da u bah Jason S Mawlong MLA ka Umsning kum u kongsan, haka jingdonlang ki nongïalam jong katei ka Village Organization naduh ka kong K Nongkseh President, kong W Warjri Secretary, Bah H Nongkseh Rangbah shnong bad kiwei kiwei ki riew rangbah.
Kum ban shu pynpaw katei ka VO haka jingïaid lynti jong ka mynta kala lah ban kdup kumba 18 tylli ki SHGs, ban seng ïaka kynhun ki longkmie na ka bynta ba kin ïeng ha la ki kjat khamtam ban ai mynsiem ba kin seng kam lajong bad leh shibun ki kam ki ba bha bad ki kam shakri paidbah hapoh katei ka Shnong khamtam ban kyntiew ïaki para longkmie.
Haba kren maitphang ha katei ka sngi naka liang ka Kong K Nongkseh kum ka President kala pynpaw ba ha kaba sdang ki don tang kumba 8 tylli ki SHG ha katei ka VO hynrei katba nangmih ki sngi kila nang lah ban thaw thymmai ban lum ban lang ïaki para longkmie ha kaba mynta katei ka VO ryngkat kitei ki SHG kila leh shibun ki kam ha katei ka shnong khamtam ban buh ruh ïaka Processing Unit ban pynmih ïaki jait jingbam bad ki umsoh kaba dei tang na ka jingtrei jong ki longkmie.
Naka liang u Bah Jason S Mawlong haba kren ha katei ka sngi u la ai ka jingïaroh ïa katei ka VO kaba la trei shaphrang ban pyni ïaki kam jong ka kaba long ka nuksa ïakiwei kiwei ki VO ban don ka jingsngewthuh jingmut bad ka jingïatreilang haba trei ïa kano kano ka kam kumba la sakhi ruh ba ki longkmie kila pyni ïala ka jong ka kaam ha katei ka shnong, ba kim donkam ban khmih lynti ïaki kam sorkar hynrei ki longkmie ki trei shitom ban pynmih pisa ha katei ka shnong bad ban kyrshan para longkmie.
