Wan ïashim bynta 140 ngut ki khynnah pule haka prokram ai jinghikai ka ABVP ha Jowai

Jowai, Risaw 24: Ka Akhil Bharatiya Vidyarthi Parishad (ABVP) West Jaiñtia Hills hynnin ka sngi saitjaiñ kala pynlong ïa ka prokram ai jinghikai (Training Camp) ïa ki dkhot kiba la rung thymmai shapoh ka seng ha ka jingïalang kaba la long ha ïing dorbar jong ka Chiliang Raij, Jowai.
Kane ka prokram ai jinghikai ka long shi bynta ban pynsngewthuh ïa ki dkhot ba thymmai halor ki rukom treikam bad ki thong ba hakhmat jong ka seng, ha kaba ïa ka jingai jinghikai la pynbynta ha ki saw bynta hapoh ka jingpynïaid jong ki dkhot ka ABVP West Jaiñtia Hills.
U Dr. Sashankutlang Khongthohrem uba dei ruh u State President ka ABVP Meghalaya, ha ka jingkren ula pynsngew ba ka ABVP ka dei ka seng kaba trei na ka bynta ka bha ka miat jong ki khynnah pule, ula ong ruh kiba bun na ki khynnah pule kila wan shakhmat ban long kum ki dkhot ka ABVP na Ri-Lum Jaiñtia, kaba kynthup naduh kiba dang pule Higher Secondary, ki Graduation bad kiwei de ki kyrdan pule.
Shuh shuh ula pynsngew ba bun kiba sngewthuh bakla ba ka seng ABVP ka dei ka seng ñiam ne ka seng ki Hindu, halor kane ula ai jingpynshai ba ki don shibun kiwei de ki jait ñiam kiba la long kum ki dkhot ka ABVP ha ka juh ka por kiba la bat ïa ki kam bapher bapher hapoh ka seng.
La ïathuh ruh ba kane ka seng kala ju pynlong ïa ka State Training Camp hynrei na kidaw bym lah kiar, la pynlong noh tang ïa ka District Training Camp, ïa kane ka juh ka prokram ai jinghikai yn sa pynlong kumjuh ha Khasi Hills bad ha East Jaiñtia Hills.
Kiwei de kiba ai jingkren ha kane ka sngi ki kynthup ïa u ma Skhemjingmut Law u nongkyrshan ba hajan ka seng ABVP, katba na ka liang ka samla Nibiang Sumer kaba long ka State Organizing Secretary ka ABVP kala ai ïa ki kyntien ai khublei halor ka jingjop jong kane ka prokram ai jinghikai.
Ha kane ka sngi ki nongwan ïashim bynta kila don haduh 140 ngut ki khynnah na kylleng ka Ri-Lum Jaiñtia.