Pulom ka jingthmu pynskhem ka Hima ïa u Lyngdoh bad u Syiem Niam ka Raid Ïapngar, ba mih ka jingpyrshah na ki para kur
Nongpoh, Risaw 24 : Ka jingthmu ka Raid Ïapngar ban pynskhem ïa u Lyngdoh bad u Syiem Niam ka Raid Ïapngar ha ka sngi Saitjaiñ ha ka Madan Liarkhla ba hap ha ka Raid Ïapngar ka la pulom noh, kaba dei hadien ba la mih ka huri hura bad ki kynrum ki kynram na ka daw ka jingdon ka jingpyrshah hapdeng ki para Kur Lyngdoh, kiba don ïa ka hok ban jied ïa u Lyngdoh bad u Syiem Niam ka Raid Ïapgnar.
Ha kane ka jingthmu ban pynskhem ïa u Lyngdoh bad u Syiem Niam ba pura ka Raid Ïapngar la wan ruh naduh u Syiem ka Hima Khyriem, Syiemship, u Dr. Balajied Syiem, hynrei ka la poi u pud haduh ba la mih ka huri hura bad ka jingïarah kti kaba dei na ka daw ka jingbym hun halor kane ka jingthmu ban pynskhem ïa u Lyngdoh Raid bad u Syiem Niam ka Raid Ïapngar.
Kumba la paw pyrthei, kane ka jngthmu ban pynskhem ïa u Lyngdoh Raid bad Syiem Niam ka Raid Ïapngar ka dei kaba la rai ban pynskhem ïa u Bah Stin Shadap, ba un long kum u Syiem Niam ka Raid Ïapngar bad ïa u Bah Mess Lyngdoh kum u Lyngdoh Raid lem bad kiwei ki nongkitkam jong katei ka Raid bad pynban ka la mih ka huri hura kaba na ka kur Lyngdoh kiba ym hun ïa kane ka rai haduh ba la hap ban pynsangeh ïa kane ka jingthmu ban pynskhem ïa u Lyngdoh bad u Syiem Niam ka Raid Ïapngar.
Namar ka jingmih kane ka huri hura, na ka liang ka Hima Khyriem ka la ai lad ba ki dei ban pynbeit shuwa ïa kane ka kynrum ka kynram hapoh shi snem bad dei tad haduh ba la dep ïa pynbiet na ïa hun ka Hima kan sa wan ban pynskhem ïa u Lyngdoh bad u Syiem Niam ka Raid Ïapngar.
Katkum ka jngtip ba la ioh lum, la ong ruh ba dang ha u bnai Nailur 2022, ki la don ki nongmihkhmat na ka Hima Khyriem ki la wan ban pynskhem ïa u Bah Pherbiang Shadap kum u Syiem Niam ka Raid Ïapngar ha ka jingïalang kaba la long ha Mawbri, hynrei namar ba kim shym la bud katkum ki riti synshar ka Raid ka HIma ka la sospon noh ïa kane ka kam bad ha ka sngi Saitjaiñ pat ka la mih biang ka huri hura hadien ba la thmu ban pynskhem pat ïa u Bah Stin Shadap kum u Syiem Niam ka Raid Ïapngar bad ïa u bah Mess Lyngdoh kum u Lyngdoh ka Raid Ïapngar.