Da ka kuna ba heh pynap ki pulit ïa kiba pynkheiñ aiñ bthah ban bud ïa kyndon aiñ ñiah kali

Nongpoh, Lber 12: Hadien kiba bun ki jingjia aksiden kaba la wanrah ruh bun ki jingjia ba sngewsih bad ka jingduh noh ki mynsiem briew haki surok bah khamtam ha Ri-Bhoi District, ka tnad pulit jong ka Nongpoh Traffic Police mynta ka sngi kala maham tyngeh ïaki paidbah kiba pynkheiñ ïaka aiñ ñiah kali ne ka Motor Vehicle Act naduh ki ar shaka, ki kali rit haduh ki kali heh bad kum ka tnad pulit kala pynap ruh da ka kuna kaba heh ïakiba pynkheiñ aiñ khamtam kiba dih kyiad haka por ba ñiah kali kumba la pynthymmai ïaki kuna hapoh ka kyndon aiñ Motor Vehicle Act, 1988.
Kum ban shu kdew hangne ba ka jingjia aksiden ha kylleng ki jaka khamtam ha Ri-Bhoi District ka jur bha jan man ka sngi bad kane ka wanrah bun ki jingjia ba sngewsih, tang namar ka jingbym burom ïaki kyndon aiñ haba ñiah kali, bad ban pynsngewthuh khamtam ïaki nongñiah kali kamai kum ka tnad pulit kala ai ruh da ka jinghikai sha ki nongñiah kali halor ki kyndon ñiah kali khamtam ki nongñiah auto rickshaw hapoh ka lama ka Nongpoh Region Auto Owners and Drivers Association ban pynbiang ruh ïaki kot donkam naduh ki license bad ki kot kali.
Ki pulit haka jingïatreilang bad ka kynhun ki nongñiah auto kila maham naduh ki trai kali kiba ai ñiah sha kiwei ba ki dei ban shim ka jingkitkhlieh ban pynbiang ïaki kot ki sla bad ban ai ñiah sha ki briew ba don ki license, bad kumjuh ruh sha baroh ki riew paidbah ba ki dei ban burom ïaka aiñ ñiah kali, khamtam ki ar shaka ha kaba ki pulit kila ong ba wat phong helmet tang haka por ba don ki pulit, hynrei kitkhlieh ïaka jingim lajong.
Haba kren sha ki lad pathai khubor naka liang u Bah B Thangkhiew uwei naki ophisar ka tnad Traffic Police ha Nongpoh u la ong ba jan man ka sngi ka don beit ka jingjia aksiden ha surok bah bad kane ka wanrah bun ki jingjia ba sngewsih bad wat ka jingduh noh ki mynsiem briew tang naka daw ba ki paidbah kiba ñiah kali kim burom ïaki kyndon aiñ ñiah kali ban phong ïaki helmet, ki seat belt bad khamtam ka jingdih kyiad haka por ba ñiah kali nalor ki kot ki sla ba donkam.
U la ong ruh ba ka surok ha Ri-Bhoi ka dei kaba kylluid hynrei bun ki jingjia aksiden ki jia namar ka jingbym burom mar kylliang bad ka jinglar lar jongki kali ba ïaid ba ïeng kaba la wanrah ki jingtynkhuh kali bad kum ka tnad pulit nangne shakhmat kan tehlakam bad pynlong ki jingtalasi naphang bad daiñ kuna ïaki kali pynkheiñ aiñ naduh ki ar shaka, naka bynta ka jingshngaiñ jong ki paidbah bad ki nongleit nongwan ha surok bah.
U Bah Banasar Lyngdoh President ka NRAO&DA u la ong ba nangne shakhmat kum ka seng ki nongñiah auto kila maham tyngeh sha baroh ki nongñiah auto naduh ki trai kali ba ki dei ban tip ïaki kyndon aiñ haba kamai bad ban pynbiang ïaki kot ki sla bad lada lap naka liang ka seng kan sa shim da ka rai ba tyngeh pyrshah ïa kiba pynkheiñ aiñ.