Kylla sem masi ka LP School ha Mawtngam SWKHD, dap da ki eit masi ha kamra klas

Mawkyrwat, Lber 12 : Ka Lower Primary School ha ka shnong Mawtngam, South West Khasi Hills District kaba dei kawei na ki School Deficit kaba la jot rathai kaba la kylla sha ka sem masi tang na ka daw ka jingbym shimkhia ban peit da ki nongseng ïa kane ka skul bad kane ka shnong Mawtngam ka don kumba 16 kilometre ei ei na Mawkyrwat bad ïa kane ka skul la dei trai da ki kynhun ki riew shimet, bad la tip ïa u Secretary jong katei ka kynhun kum u bah Philossophar Shangdiar na ka shnong Tynnai, South West Khasi Hills District.
Lah ban kdew ba kane ka shnong Mawtngam ka dei ruh ka shnong jong uwei u Syiem bakhraw jong ka Hima Maharam kata u Sngap Sing Syiem.
Haba kren ha ki lad pathai khubor u bah Lamphranglin Iawphniaw uba dei u Myntri jong ka shnong Mawtngam ula ong ba ki khynnah kiba shong skul ha ka Lower Primary School, Mawtngam ki don kumba 20 ngut bad i wei i nonghikai bad ha kane ka skul ka don naduh klas A haduh IV.
“Kaba kham i sangsot ka dei, ba ka iing skul kaba ju pynlong klas la dap da ka eit masi suda bad ka la pei lut ki tnum jong ka ïing, namar ka jingjot rathai bad dap da ki eit masi ha ka kamra klas la hap ban pynlong klas noh ha ka ïing shet ja bam sngi jong ki khynnah skul bad lada jur palat u slap la hap ban pynlong klas noh ha ïing ki briew”, ïathuh u bah Lamphranglin.
Ym tang kata na ka liang jong u bah Lamphranglin Iawphniaw, Myntri Shnong Mawtngam u la ïathuh ba la seng ïa kane ka Lower Primary School naduh ki snem 1980 ei ei ha kaba na ka liang ka shnong ka la pyrshang ban pan na une trai nongseng ïa kane ka skul ba kin peit noh da ka bor shnong hynrei kine ki nongpynïaid kim shem la treh ban aiti noh ïa kane ka skul ha ka shnong bad haba ki la pyrshang ban pan jingïarap na ki bor ba dei khmih ïa ki skul hynrei kim shem la ïoh satia ïa kita ki lad jingïarap.
Ha kaba ïa dei bad ka jingbam ja sngi jong ki khynnah skul ne kata ka Meat Day Meal, u Myntri Shnong Mawtngam ula ong kane ka skul ka la ïoh ïa kane ka bha hynrei mynta pat ka la shu jah noh khlem ïoh jingtip shuh bad kumjuh ruh ka jingsiew ïa u nongshet pat naduh ka 1996 haduh mynta u khlem ïoh shuh ïa ka jingsiew kaba la shu jah klep khlem jingtip.
Namarkata, u bah Lamphranglin Iawphniaw, Myntri Shnong Mawtngam u la buh jingkyrpad ïa ka tnad pule puthi jong ka sorkar ba ka dei ban phai khmat lem sha kane ka skul da kaba thaw lem ki lad ki lynti ym ban shu ieh ne peit hynrei ka dei ban ai ki lad jingïarap khnang ba ki khynnah skul kin ïoh ïa kata ka hok ba ki dei ban ïoh ha ka liang ka pule puthi kumba ïoh lem kiwei.