Shillong, Naitung 30: Ki artylli ki shnat treikam jong ka KSU kiba kynthup ïa ka KSU South West Khasi Hills bad ka KSU Balat Border Area Circle ha ka shithi ba ki la phah sha ka Deputy Commissioner ka East Khasi Hills District ka kong R M Kurbah ki la ujor halor ka jinglait lan jong ki nong Bangladesh ban wan kiew ha ki thaiñ Dangar East Khasi Hills District bad ki la dawa ruh na ka DC ba ka dei ban pynlong da ka jingtohkit bniah halor ka jingïoh wanrung kitei ki briew nabar ri bad ban pynshitom ïa ki briew bad ki shipai ïada pud kiba donkti ban pynrung tuh ïa ki nong Bangladesh shapoh u pud u sam ka ri India.
Haba kren sha ki lad pathai khubor ha ka sngi baar ka KSU ka la ong ba ka dap da ka jingsngewkhia halor ka jingïoh lad ban wan kiew lait lan jong ki khar Bangladesh hapoh u pud u sam jong ka jylla bad ha ki bynta jong ka East Khasi Hills district.
Ki nongïalam ka KSU kiba kynthup ïa u President ka KSU SWKHD u Bah Forwardman Nongrem bad u President ka KSU Balat Area Circle u Bah Bonsen Snaitang kiba dei ruh ki nongïalam ba la soi ïa ka shithi ki la ïathuh ba katkum ka jingtip jong ka seng na ka jingïathuh ki nongshong shnong ba sah ha khappud bad ka ri Bangladesh, kine ki briew ki ju wan kiew shaduh ki bynta jong ka shnong Dangar.
“Katkum ka jingsaphriang na ki dur ringdur la ïohi ba ki ju wan da ki lieng hapoh kane ka shnong bad ki bynta ba marjan da ka jingthmu ban wan kit maw bad imat ruh na ka bynta kiwei kiwei pat ki daw kiba ngim lah ban tip. Kane ka jingwan kiew hapoh u pud u sam ka ri India ka ju jia haduh kumba laisien ha ka shi taïew bad ka ju jia ruh ym tang ha ka por mynsngi hynrei wat mynmiet ruh kumjuh,” ong ki nongïalam ka KSU.
Ki la ong ba ka seng ka don ka jingsuba jur ba kane ka jingwan kiew jong ki nong Bangladesh kam dei tang ba kin wan kit maw hynrei ka don ruh ka jingpyrshang ban pynrung tuh na katei ka jaka ban wan buhai shnong hapoh ki bynta jong ka East Khasi Hills bad kiwei kiwei ki jaka.
“Ngi pynpaw ruh ka jingbym shaniah ïa ki rukom treikam jong ki shipai ïada khappud BSF namar kumba ka paw kine ki shipai pahara watla ki la ïohi ïa ka jingwan kiew jong ki nong Bangladesh hynrei ki la shu peitkai kim shym la khang ne kem ïa ki nong Bangladesh kiba wan rung beaiñ hapoh u pud u sam jong ka ri India,” ong ki nongïalam ka KSU.
Halor kane ka KSU ka la kyrpad ïa ka Deputy Commissioner ba kadei ban tuklar mardor halor kane ka bynta namar ka jingailad ïa ki nong Bangladesh ka la buh ha ka jingsyier ïa ki paidbah bad ki nongshong shnong kiba shong basah ha kito ki jaka.
“Ka seng ka dawa badei ban shimkhia kloi katba lah ha shwa ban mih kino kino ki jingjia ba sngewsih hapoh ka thaiñ. Ngi dawa ruh ïa ka ophis DC ban phah tohkit bniah bad ban pynshitom ruh ïa ki briew bad ki shipai ïada khappud kiba donkti ban pynrung tuh ïa ki briew ban wan kit maw ne ban buhai shnong hapoh ka jylla jong ngi,” ong ka KSU.
