Ka kam ki shipai Assam Rifles ka long ban pynthikna ka shongsuk shongsaiñ, ong u Lt. Nair

Shillong, Naitung 30: U Lt Gen PC Nair, PVSM, AVSM, YSM, PhD, Director General ka Assam Rifles, u la ïaroh ïa ki officer bad ki shipai jong ka Assam Rifles halor ka jingaiti ban pynthikna ïa ka shongsuk shongsaiñ ha kane ka thaiñ shatei lammihngi kaba long kaba kongsan na ka bynta ka jingkiew jong ka ri. Haba ban jur ïa ki jinglah ban tem ïa ki kam bymman, u Lt Gen Nair u la batai halor ka bynta kaba kongsan jong ki shipai Rifles kiba la trei na ka bynta ban ïada ïa ki jaka khappud ha baroh ki jaka kane ka thaiñ shatei lammihngi bad ka Jammu & Kashmir, kiba la leh ban ïakhun ïa kiba bun ki kam kiba ïadei bad ka shongsuk shongsaiñ.
U Lt Gen Nair u la ïaroh ruh halor ki kam ban ïalam bad ka jinglenlade ba la aiti da ki shipai ban pynneh ïa ka jinglong kawei bad ka jingïasohlang jong baroh kawei ka ri. U la pynpaw ka jingithuh halor ki kam ba la pyrshang khlem shong thait jong ki shipai hapoh jylla Manipur, wat hapdeng ba ki mad ïa ki jingshah pynsaphriang khubor ba bakla na ki riew shimet bad ki kynhun kiba don ka jingmyntoi shimet.
U la ai burom ruh ïa ki officer bad ki shipai kiba la trei shitom ban tehlakam ïa ki kam umsnam da kaba pynneh ruh ïa ka jingïalong kawei hapoh ka ri. Haba pynpaw ïa ka jingaiti jong ki shipai na ka bynta ka bha ka miat jong kiba la shongthait, u Lt Gen Nair u la kdew ïa ka jingdonkam ban thaw ïa ka Veteran’s Day ha ka 23 bnai Lber manla u snem, ban ithuh ïa ki kam shlur bad ki jingaiti ba shimet jong ki Veteran.
U la leit jngoh ruh bad ai khublei burom ïa ki shipai kiba shlur bad pynpaw ka jingai khublei kaba naduh mynsiem ïa baroh ki rank halor ka jingshlur bad ki jingjop bad ka jingïoh burom.
U Lt Gen Nair u la ai khublei ruh ïa u Lt Gen Vikas Lakhera, AVSM, SM, bad pynpaw ka jingshaniah skhem ba ki shipai kin ïoh bun ki jingmyntoi hapoh ka jingïalam jong u Gen Lakhera ha kane ka North East.
U Lt Gen PC Nair, uba la shakri kum u Director General ka Assam Rifles ha kine ki 3 snem ba la leit bad un shong thait noh ha ka 31 tarik mynta u bnai, 2024, ban pynkut noh ïa ka kam shakri ha ki kam shipai kaba la long kumba 38 snem bad 7 bnai.