Da ka jingphuh jingphieng pdiang burom biang ka Hima Langrin ïa u Nangtei Syiemïong

Mawkyrwat, Naitung 19: Da ka jingkmen bad ka jingphuh jingphieng, ki paidbah ka Hima Langrin Syiemship ki la pdiang burom biang ïa u Bah Nangtei Syiemiong hadien ba u la shah pynskhem biang kum u Syiem ba pura jong ka Hima Langrin Syiemship, na ka daw jong ka jingshah suspend la jan kot lai snem ei ei.
Ka jingshah suspend jong u Pa’iem Nangtei Syiemiong ka dei ha ka 18 tarik u Nailar, 2023 ha kaba ka la mih ka jingkynnoh na katto katne ki briew na ka Hima Langrin Syiemship ki la ujor pyrshah ïa u, da kaba ong ba u la pyndonkam bakla ïa ka pisa jong ka Hima bad ba u la pyniaid donbor ïa ki bynta bapher bapher jong ka bor synshar ha ka Hima.
Hynrei, hadien ba ka Khasi Hills Autonomous District Council (KHADC) ka la bishar bniah ïa baroh ki kot ki sla bad ki sakhi ba la ai da ki nongujor, kam shym la lap satia ïa kano kano ka jingbakla lane ka jingpynkheiñ aiñ da u Pa’iem Nangtei Syiemiong katkum ki jingkynnoh ba la mudui pyrshah ïa u.
Namarkata, ha ka 15 tarik ‘Naitung 2026, ka KHADC ka la rai ban pynskhem biang ïa u Pa’iem Nangtei Syiemiong kum u Syiem ba pura jong ka Hima Langrin.Ha kajuh ka por, la pyndam noh ïa ka sanad jong u Acting Syiem, u Bryllyenhenry Syiemiong, uba la shimti shipor ïa ka kam Syiem.
Ha ka jingpdiang burom ïa u Syiem, la sakhi ïa ka jingïalang kaba iphuh iphieng ha kaba ki Myntri, ki Lyngdoh, ki Longkmie bad ki Samla jong ka Hima Langrin ki la ai ki jingkren pdiang sngewbha bad pynpaw ïa ka jingkmen halor ka jingwanphai biang jong u Pa’iem Nangtei Syiemiong ha ka shuki Syiem.