Da ka jaka bam ha shiteng riat na Laitlum sha Rasong nalor ka surok bad ki cable car ropeway

Shillong, Ïaiong 14: Ha ka jinghiar leit jngoh ïa ka shnong Rasong ha ka 11 tarik u Ïaiong, 2023 kaba long shi bynta ka jingleit ai khublei ïa ki nongshong shnong na ka bynta ka jingkyrshan kaba ki la ai ha ka elekshon MLA ba dang shu dep, u Bah Banteidor Lyngdoh, MLA ka Mawkynrew u la kular ba yn pynkiew ïa ka kam jngohkai ha katei ka thaiñ da kaba wanrah ïa ka jaka bam bad jaka sah ki nongwan jngohkai ha shiteng riat kata ha shiteng jong ka shnong Laitlum bad Rasong.
Ha kane jingleit jngoh ïa katei ka shnong, u Bah Banteidor u la wan ban jurip ïa ka Aganwadi Centre kaba la donkam ban shna pynbha bad ïa mir jingmut bad ki nongshong shnong ban wanlam da ki Cable Car Ropeway ban hiar ban kiew sha katei ka shnong kaba ym pat lait surok.
Ha kaba ïa dei bad ka surok sha katei ka shnong, u Bah Banteidor u la kular ban thaw ki lad ki lynti ban pynurlong ïa ka. Ha katei ka sngi la ïa mir jingmut ruh ban wanrah ïa ki Processing Unit ban pynmyntoi ïa ki nongrep soh rep pai ha katei ka shnong lyngba ki Self Help Group.
Na ka liang ka shnong ka la ai ïa ka dorkhas halor kitei ki mat jingdawa bad na ka liang u Bah Banteidor u la ong ba ka jingïatreilang kan don beit kumba long ha ki snem kiba la dep bad ban kyntiew ïa ka roi ka par ha ka Constituency hi baroh kawei bad kine ki jingdawa na ka liang ka shnong yn sa peit bniah ban pynurlong ïa ki.
Ha kawei pat ka liang ha ka 11 tarik u Ïaiong, 2023, u Bah Banteidor u la hiar jurip ïa ka jaka shna Sub Centre ha Mawlat bad kumjuh ïa ka jingtrei ba dang ïaid shaid shaid ban tei ïa ka ophis u BDO ka Mawkynrew C&RD Block ha ka jingïadonlang ki nongïalam shnong, u Bah G Dhar, BDO kane ka Block lem kiwei pat.