Dawa siew bailutksan ka MPMCC sha ki bahaing jong ki arngut kiba khlad ha riat Rngaiñ

Shillong, ïaïong, 16: Ka Meghalaya Pradesh Mahila Congress (MPMCC) ka la pynpaw ïa ka jingsngewlem ïa ki bahaing hasem kiba la duhnoh ïa ki arngut ki baieid ba thoiñ ha ka jingtwa khyndew ha surok Shillong-Dawki, ha riat Rngaiñ, kaba dang hap hapoh ka Pynursla Civil Sub-division.
Ka Mahila Congress ha u kyrwoh ka la pynpaw ba ka jingkren jong u Symbud Myntri Rangbah ka Jylla ban ujor ejahar kam don nongrim eiei hynrei ka dei tang ka jingkren lait jynhaw tang ban ïada ïa kiba donkti watla ki la tip shai ba ka jingtih maw be-aiñ kam shym la long katkum ki kyndon aiñ. “Ka long kaba isammut ba u Symbud Myntri Rangbah un ong ujor ejehar hynre ka jingkylli kaba mih mynta ka long pyrshah ïano? Hato ka jingujor ejahar kan long pyrshah ïa ka mariang, lane pyrshah ïa ki maw kiba twa?
“Balei ka Company ARSS kaba la ïoh kontrak ban shna ïa kane ka surok na ka NHIDCL da ka jingbei pisa jong ka JICA kam don jingkitkhlieh ban buh ïa ki dak jingmaham ha shilynter jong ka surok watla ki tip shai ba ka jingïaid kali ka long manla ka kynta nalor ba ki nongleit jngohkai pyrthei ki ju ïaid manla ka sngi,” la buh jingkylli ka State Mahila President ka Kong Joplyn S.Shylla.
Ka la ong, na ka por sha ka por, ki la jia ki jingjia aksiden namar ka jingpynher shaba palat jong ki trok kiba leit sha Dawki nalor ba ki kit ïa ki maw shi kali khlem ki kot ki sla kiba biang. “Hato u leh aiu u State Transport Commissioner bad ka ophis jong u District Transport Officer ka East Khasi Hills? la buh jingkylli kane ka nongïalam.
Kum kine ki jingjia ba sngewsih ki buh ïa u dak jingkylli uba heh ïa ka jingtreikam jong ka SDO Civil Sub-division bad ïa ka jingtorti jong ka tnat PWD ka bym shym la bud ryntih ïa ki kyndon ïada mariang.
Ka party ka la dawa ba dei ban pynkynriah kam noh mardor ïa ki ophisar bad ba ka Sorkar, ka NHIDCL bad ka Mining Association ki dei ban siew ïa ka bailutksan sha ki bahaing hasem jong ki arngut ki lanot.