Shillong, K’Lyngkot 07 : Ka sorkar jylla ka la rai ban leh da ka ‘geotag’ ban buddien ïa baroh ki tyllong um da ka thong ban ïada ïa ki wah kiba don ha baroh kawei ka jylla.
Katei ka rai ba ka sorkar ka shim kadei hadien ba ka ïohi ba bun ki tyllong um ki la shah ktah jur ha ka jingkylla sor.
“Ngin leh da ka ‘geotag’ ïa baroh ki tyllong um khnang ban lap kaei kaba donkam ban leh kyrkieh khnang ban ïoh ïada ïa ki tyllong um,” ong u Myntri ka tnad PHE ka sorkar jylla, Marcuise N Marak haba kren bad ki lad pathai khubor.
U ong ruh ba ka tnad shen kan sa shong pyrkhat bad kiwei pat ki tnad sorkar ban pynkhreh ïa ka jingtreikam.
Da kaba banjur ïa ka jingdonkam ban ïada ïa ki tyllong um, u Myntri u la ong ruh ba u Myntri Rangbah u la dep ban thaw ruh ïa ka water expert body, kaba shen kan sa shong ïa ka jingïalang pyrkhat kam ha nongbah Shillong.
Stressing on the need to protect catchment areas, Marak said that the chief minister has already constituted a water expert body, which will soon hold a conference here in Shillong.
“Kin sa wan ki riewshemphang naduh Delhi ruh bad ngin sa don ïa ka jingïalang pyrkhat kam kaba shisngi ban ïakren ïa ki mat kiba kongsan,” u la ong. Katkum ka jingïathuh jong u, ha katei ka conference yn sa wan ban donlang ruh naduh ki heh sorkar na ka tnad Forest and Environment, Water Resources, Soil and Water Conservation bad kiwei kiwei.
U Myntri u ïathuh ruh ba ka long kaba donkam ban plie lad da kiwei pat ki lad kamai jakpoh na ka bynta ki nongshong shnong kiba imja da kaba trei ha ki par kiba don hajan ki tyllong um.
“Na ka tnad ngi la sdang ban leh ïa ka jingwad bniah bad ynda ngi la dep, nga la dep kren lypa bad u Myntri Rangbah kumno ban ai ïa kiwei pat ki lad kamai na ka bynta jong ki,” u la bynrap biang.
La ïathuh ruh ba dang shen, u Myntri ka tnad Water Resources, Comingone Ymbon u la leit ban jurip ïa ka wah Umkhen ban buddien halor ka rukom tih maw kaba la ktah haduh katta katta ïa ki tyllong um kaba suplai um sha ki hajar tylli ki longiing ha Madanrting bad kiwei ki bynta jong ka Shillong.
U Myntri u la pyntip ruh ba ka sorkar jylla lygnba ka ‘payment for eco-system (PES) ka la pyrshang ban ïada ïa ki tyllong um ha kylleng ki bynta jong ka jylla. U ong ruh ba lyngba ka PES ym dei ba ki thied ïa ka jaka hynrei ki ailad ba ki trai kin lah ban wad lad da kiwei pat ban kamai kajih.
