Shillong, K’Lyngkot 07 : Hadien ba ka sorkar jylla ka la weng ïa ki lai ngut ki dkhot ka Meghalaya Lokayukta mynta ka sngi ka Voice of the People Party ka la byrngem ban mih ïakhih sha madan lada ka sorkar kam thung biang ïa kine ki dkhot kiba tohkit halor ka bamsap ba kynthup ïa u MLA ka NPP uba dei ruh u bahaiing bajan jong u Myntri Rangbah ka jylla.
Ha ka kyrwoh sha ki lad pathai khubor u President ka party u Bah Ardent u la ong ba kane ka jingpynkut tang shiteng por ka sorkar MDA ïa ka jingtreikam kine ki Investigating Officer jong ka State Lokayukta ka dei beit ban ïada ïa ki MLA ka NPP kiba donkti ha ki kam bamsap.
Ka VPP ka la dawa ruh ba u Myntri Rangbah ka jylla u dei ban sangeh mardor ban lulia ïa ka kam jong ka Lokayukta.
Shuh shuh ka VPP ka la byrngem ruh ba lada ka sorkar kam thung biang ïa kine ki lai ngut ki ophisar kan mih sha surok ban ïakhun haduh ba ka sorkar kan thung biang ïa ki bad ruh ban ïakhun pyrshah ïa ka jyrsieh bamsap ba shyrkhei ka sorkar MDA ba ïalam ka NPP.
Ka VPP ka kdew ruh ba ki nongshong shnong ka jylla ki don hok ban ïoh ïa ka synshar ba khuid ba suba ha kaba ka synshar khadar ruh ka ïaid beit ïaid ryntih kumba dei hok.
